Сёмы чэрвень запар у Беларусі тэмпература перавысіла норму

8 ліпеня, Позірк. Сёмы чэрвень запар у Беларусі тэмпература перавысіла норму, сведчыць праведзены “Позіркам” аналіз звестак Белгідрамета.

У чэрвені сярэдняя тэмпература склала 18,9 градуса цяпла пры норме 17 градусаў. Гэтае 8-е месца сярод усіх чэрвеняў пасля 1945 года, адзначаюць сіноптыкі.

У чэрвені 2018 года сярэдняя тэмпература перавысіла норму на 1,2 градуса (17,6 супраць 16,4), у 2019-м — на 4,6 (21), 2020-м — на 3,2 (19,6), 2021-м — на 3,5 (19,9), 2022-м — на 2 (19 супраць новай нормы 17 градусаў), 2023-м — на 0,7 (17,7).

Максімальнага значэння (+33,5 градуса) тэмпература паветра дасягнула днём 30 чэрвеня на станцыі Жыткавічы, мінімальнага (+4,8) — ноччу 9 чэрвеня ў Бярэзінскім запаведніку.

За месяц у сярэднім выпала 83 мм ападкаў (83 л вады на квадратны метр тэрыторыі), што склала 116% кліматычнай нормы. У Брагіне абноўлены гістарычны месячны і сутачны максімум сумы ападкаў.

Чэрвень 2023 года быў больш сухім: 61,4 мм, або 85% нормы.

Паўсюдна назіраліся навальніцы, у асобных раёнах выпаў град дыяметрам да 17 мм (2 чэрвеня ў Ашмянах), месцамі ўтвараліся туманы. 12 чэрвеня ў раёне станцыі Брагін назіраўся вельмі моцны дождж з колькасцю ападкаў 59,6 мм, што лічыцца небяспечнай з’явай надвор’я.

Максімальная хуткасць ветру зарэгістраваная ў Слаўгарадзе 20 чэрвеня (24 м/с), паведамляе Белгідрамет.