Генсакратар Беларускага Чырвонага Крыжа Шаўцоў працягвае працу, нягледзячы на патрабаванне Міжнароднай федэрацыі аб адстаўцы

1 лістапада, Позірк. Генеральны сакратар Беларускага Чырвонага Крыжа (БЧК) Дзмітрый Шаўцоў застаецца на чале арганізацыі і працягвае “выконваць свае паўнамоцтвы”, паведамляе ТАСС.

“У адпаведнасці са статутам Беларускага Чырвонага Крыжа да выключнай кампетэнцыі З’езду [БЧК] адносяцца пытанні абрання, перавыбрання, звальнення генеральнага сакратара. 7 верасня XXVI З’ездам <…> прынята аднагалоснае рашэнне аб працягу працы Дзмітрыя Шаўцова ў займаемай ім пасадзе генеральнага сакратара”, — заявілі ў арганізацыі.

3 кастрычніка Міжнародная федэрацыя таварыстваў Чырвонага Крыжа і Чырвонага Паўмесяца (МФТЧКіЧП) заклікала Шаўцова вызваліць пасаду генеральнага сакратара БЧК да 30 лістапада.

Прэтэнзіі да генеральнага сакратара паўсталі на фоне яго візітаў у акупаваныя Расіяй украінскія гарады Луганск і Данецк, заяў аб перамяшчэнні ўкраінскіх дзяцей з акупаваных тэрыторый, аб выкарыстанні ядзернай зброі.

Адзначалася, што калі БЧК не адхіліць Шаўцова ад пасады да пазначанага тэрміну, то будуць аўтаматычна прыпыненыя членскія правы арганізацыі, фінансаванне, яна не зможа ўдзельнічаць у Генеральнай асамблеі МФТЧКіЧП, а значыць і галасаваць на ёй і інш.

6 кастрычніка Беларускі Чырвоны Крыж заявіў, што “вывучае” патрабаванне МФТЧКіЧП.

Гл. таксама:

Структура Міжнароднага Чырвонага Крыжа патрабуе адстаўкі генсакратара БЧК Шаўцова да 30 лістапада