Лукашэнка адзначыў “кампетэнтнасць і сумленнасць” падаткавікоў, віншуючы іх з прафесійным святам
14 ліпеня, Позірк. “Падатковая служба Беларусі выконвае важную функцыю — забяспечвае напаўненне бюджэту, пастаянна ўдасканальваючы механізмы сваёй працы, укараняючы самы перадавы вопыт і найноўшыя лічбавыя сервісы”, — заявіў Аляксандр Лукашэнка, віншуючы 14 ліпеня з прафесійным святам работнікаў і ветэранаў падатковых органаў.
Паводле яго слоў, якія перадае прэс-служба, “адным з эканамічных прыярытэтаў Беларусі” цяпер з’яўляецца “змена звыклай лагістыкі айчынных тавараў, пошук новых рынкаў і партнёраў”. “У гэтых умовах, — сцвярджае віншавальнік, — неабходна падтрымліваць спрыяльнае асяроддзе для добрасумленных плацельшчыкаў і інвестараў, спалучаючы аптымальную падатковую нагрузку з разумным кантролем”.
“Перакананы, што і ў далейшым вы будзеце дэманстраваць кампетэнтнасць, сумленнасць і адказнасць на ўсіх узроўнях, а вашы канструктыўнасць і здольнасць працаваць на перспектыву стануць надзейнай гарантыяй вырашэння значных для Беларусі задач”, — гаворыцца ў віншаванні.
Артыкул 243 Крымінальнага кодэкса (ухіленне ад выплаты падаткаў) выкарыстоўваецца ўладамі Беларусі для палітычных рэпрэсій.
Яго выкарыстоўвалі для пераследу прэтэндэнта на пасаду прэзідэнта Віктара Бабарыкі (у канчатковае абвінавачванне не ўвайшоў), асуджанага на 14 гадоў зняволення. Сына палітыка Эдуарда Бабарыку асудзілі ў ліпені 2023 года на 8 гадоў пазбаўлення волі па чатырох артыкулах КК, уключаючы арт. 243. 12 ліпеня ён быў дадаткова прыгавораны да 2 гадоў зняволення.
З выкарыстаннем абвінавачвання ва “ўхіленні ад выплаты падаткаў” да 12 гадоў пазбаўлення волі прыгавораная былая генеральны дырэктар кампаніі “ТУТ БАЙ МЕДЫЯ” Людміла Чэкіна. Гэты артыкул быў уключаны ў абвінавачванне галоўнага рэдактара Марыны Золатавай (пасля выключаны), якая таксама асуджаная на 12 гадоў зняволення па палітычна матываванай крымінальнай справе.
Пераслед праваабаронцаў Алеся Бяляцкага, Валянціна Стэфановіча і Уладзіміра Лабковіча арганізоўваўся ў ліку іншага паводле арт. 243 КК. Пазней гэты артыкул з абвінавачвання прыбралі. Бяляцкага прыгаварылі да 10 гадоў пазбаўлення волі, Стэфановіча — да 9, Лабковіча — да 7.
Прыгавораны да 14 гадоў зняволення па “справе БелаПАН” медыяменеджар Андрэй Аляксандраў таксама сярод іншага быў абвінавачаны ва “ўхіленні ад выплаты падаткаў”.
Беларускія ўлады дамагаюцца экстрадыцыі з Сербіі па лініі Інтэрпола рэжысёра Андрэя Гнёта, абвінавачваючы яго паводле ч. 2 арт. 243 КК. Мужчына з’яўляецца сузаснавальнікам аб’яднання SOS.by, якое ў Беларусі прызнана “экстрэмісцкім фарміраваннем”. Ён і яго адвакаты лічаць справу палітычна матываванай.