18 ліпеня, Позірк. Мінулай ноччу адноўлена электразабеспячэнне ў 140 населеных пунктах Гомельскай вобласці, паведамляе прэс-служба Міністэрства энергетыкі.
У 293 населеных пунктах аднаўленчыя работы яшчэ працягваюцца.
“У ліквідацыі тэхналагічных парушэнняў у цяперашні час задзейнічана 183 аварыйныя брыгады і 260 адзінак тэхнікі”, — удакладняе ведамства.
У раёны, якія застаюцца без святла, “працягваецца дастаўка з іншых рэгіёнаў перасоўных дызель-генератарных установак”, гаворыцца ў паведамленні.
“Работы па расчыстцы паваленых дрэў вядуцца днём і ў начны час. Робіцца ўсё магчымае, каб энергетыкі маглі хутчэй дабрацца да пацярпелых ад непагадзі участкаў электрасетак для іх аднаўлення”, — адзначылі ў Мінэнерга.
Праз наступствы ўраганнага ветру 15 ліпеня ў рэгіёне ўведзены рэжым надзвычайнай сітуацыі.
Увечары 16 ліпеня першы намеснік міністра па надзвычайных сітуацыях Аляксандр Худалееў адрапартаваў аб аднаўленні ў Мазыры водазабеспячэння. Яго словы абверглі жыхары горада.
17 ліпеня Міністэрства абароны паведаміла аб адпраўцы ў Гомельскую вобласць вайскоўцаў для ліквідацыі наступстваў непагадзі.
Паводле звестак МНС, ад непагадзі ў Беларусі загінула 6 чалавек, у тым ліку двое дзяцей.
У аздараўленчым лагеры ў Рэчыцкім раёне Гомельскай вобласці ад падзення дрэва загінула дзіця, яшчэ некалькі пацярпела. У Магілёўскім раёне ўвечары 14 ліпеня 5-гадовая дзяўчынка памерла з-за траўмы, атрыманай у выніку падзення на яе дрэва.
