На раніцу 18 ліпеня Літва не прапусціла на сваю тэрыторыю 26 аўтамабіляў з беларускімі нумарамі

18 ліпеня, Позірк. З 00:00 гадзін 18 ліпеня па стане на 7:00 Літва не прапусціла на сваю тэрыторыю 26 аўтамабіляў з беларускімі рэгістрацыйнымі нумарамі.

На прапускным пункце Шальчынінкай (з беларускага боку — Беняконі) спынена 16 аўто з беларускай рэгістрацыяй, паведаміў парталу lrt.lt гендырэктар Мытнага дэпартамента пры Міністэрстве фінансаў Дарус Жвіронас.

Начальнік памежнага пераходу Мядзінінкай (Каменны Лог) Арунас Даўбарс у сваю чаргу паведаміў, што да раніцы чацвярга было вернута на беларускую тэрыторыю “каля дзесяці” аўтамабіляў, прычым сярод іх быў транспартны сродак, якім кіравала грамадзянка Літвы.

Паводле слоў намесніка міністра замежных спраў Літвы Сіманаса Шатунаса, згодна з новымі правіламі пропуску, выключэнні для ўезду ў краіну распаўсюджваюцца толькі на асоб, якія маюць дзейную візу або від на жыхарства ў Літве, а таксама на кіроўцаў, якія кіруюць уласнымі аўтамабілямі. Такі парадак праходжання мяжы будзе дзейнічаць да 16 жніўня, пасля гэтага ўезд у Літву будзе забаронены ўсім аўтамабілям з беларускімі нумарамі.

Пра тое, што з 18 ліпеня Літва перастане ўпускаць легкавыя аўтамабілі з беларускімі нумарамі, стала вядома 17 ліпеня. “Забарона на ўезд на тэрыторыю ЕС распаўсюджваецца на легкавыя аўтамабілі незалежна ад грамадзянства іх уладальніка або кіроўцы”, — заявіў Мытны дэпартамент Літвы, спаслаўшыся на выкананне санкцый Еўрасаюзу ў рамках пастановы № 765/2006 (з унесенымі пастановай № 2024/1865 папраўкамі).

Адзначалася, што да 16 жніўня дазволены ўвоз легкавых аўтамабіляў, якія належаць грамадзянам Беларусі з дзеючай візай, відам на жыхарства пры ўмове, што транспарт прызначаны для асабістага карыстання, але не для продажу. Гэтая агаворка не распаўсюджваецца на аўтамабілі, якія належаць юрыдычным асобам або выкарыстоўваюцца ў камерцыйных мэтах.

Мытня Літвы адзначала, што грамадзянам Беларусі, чый аўтамабіль ужо знаходзіцца на тэрыторыі Літвы, давядзецца выехаць або перарэгістраваць транспартны сродак цягам шасці месяцаў.

Пасля 18 студзеня 2025 года знаходжанне аўтамабіляў з беларускімі нумарамі на тэрыторыі краіны будзе лічыцца парушэннем закона і карацца штрафам або канфіскацыяй транспарту.

Пры гэтым забарона не распаўсюджваецца на дыпламатычныя аўтамабілі, калі транспартны сродак выкарыстоўваецца дыппрадстаўніцтвамі і міжнароднымі арганізацыямі, якія карыстаюцца імунітэтам у адпаведнасці з міжнародным правам.

З 16 ліпеня асобам на легкавых аўтамабілях з беларускімі нумарамі забараняецца ўязджаць у ЕС праз пункты пропуску на мяжы Латвіі з Беларуссю і Расіяй. Рыга пайшла на гэты крок, каб забяспечыць выканання санкцый ЕС. Забарона не распаўсюджваецца на транспарт, які выкарыстоўваюць дыпламаты.

Міністэрства юстыцыі Латвіі таксама распрацоўвае законапраект, які забараняе транспарту з беларускімі нумарамі заставацца ў краіне і перасякаць мяжу транзітам. Аўтамабілі, якія ўжо знаходзяцца на латвійскай тэрыторыі, прыйдзецца перарэгістраваць. Дакумент рыхтуецца да перадачы ў камісію Сейма па нацыянальнай эканоміцы, аграрнай, экалагічнай і рэгіянальнай палітыцы.

Гэтая норма ўжо дзейнічае ў дачыненні да зарэгістраванага ў РФ транспарту.

17 ліпеня аб забароне на ўезд аўтамабіляў з беларускімі нумарамі заявілі ў Эстоніі.

З 9 ліпеня ў чатах і сацсетках распаўсюджваецца інфармацыя, што ў Польшчу не ўпускаюць беларускія аўтамабілі, калі ў салоне адсутнічае іх уладальнік.

29 чэрвеня Савет ЕС прыняў новыя абмежавальныя меры эканамічнага характару ў дачыненні да Беларусі ў сувязі з удзелам рэжыму Аляксандра Лукашэнкі ў расійскай агрэсіі супраць Украіны. Сярод іншага была пашыраная забарона на перавозку грузаў аўтатранспартам па тэрыторыі ЕС прычэпамі і паўпрычэпамі з беларускай рэгістрацыяй, у тым ліку пры перавозцы грузавікамі, зарэгістраванымі не ў Беларусі.

Акрамя таго, каб мінімізаваць рызыку абыходу санкцый, зарэгістраваным у ЕС кампаніям, якія належаць беларускім фізічным або юрыдычным асобам на 25% або больш, “павінна быць забаронена станавіцца аўтатранспартным прадпрыемствам або перавозіць тавары аўтатранспартам у саюзе, у тым ліку транзітам”.

Дэмакратычны лідар Святлана Ціханоўская заявіла 16 ліпеня, што “абмежаванні на ўезд у Еўрасаюз аўтамабіляў з беларускай рэгістрацыяй — “паспешнае і шкоднае рашэнне, якое б’е па людзях, а не па рэжыме Лукашэнкі”.