19 ліпеня, Позірк. Звярнуць увагу на крытычную сітуацыю з беларускімі палітвязнямі, паспрыяць іх вызваленню, асабліва тых, хто ў цяжкім стане, папрасіла Святлана Ціханоўская прэзідэнта Францыі Эманюэля Макрона.
Перамовы адбыліся 18 ліпеня ў Вялікабрытаніі падчас саміту Еўрапейскай палітычнай супольнасці, паведаміла прэс-служба дэмакратычнага лідара.
Адзначаецца, што гэта іх другая сустрэча. Першая была ў верасні 2020 года, і Макрон быў першым замежным лідарам, які сустрэўся з Ціханоўскай.
Ціханоўская выказала ўдзячнасць Францыі за прызначэнне спецпасланніка па Беларусі (з кастрычніка 2022 года гэта Віялен дэ Вільмер), падтрымку грамадзянскай супольнасці, выказала занепакоенасць, што рэжым і Расія ўцягваюць Беларусь у вайну супраць Украіны. Дамовіліся працягнуць кансультацыі на рабочым узроўні.
“Я ўдзячная Францыі за пазіцыю ў дачыненні да Беларусі, за выдачу віз беларусам, за падтрымку на міжнароднай арэне. Нам хацелася б больш супрацы, і нам патрэбна дапамога прэзідэнта — у тым ліку ў пытанні вызвалення палітвязняў. Мы будзем змагацца за кожнага”, — адзначыла Ціханоўская пасля сустрэчы.
