22 паселішчы ў Беларусі па-ранейшаму сілкуюцца электрычнасцю ад генератараў

23 ліпеня, Позірк. Раніцай 23 ліпеня ў Беларусі заставалася 22 населеныя пункты, якія сілкаваліся электрычнасцю не ад энергасістэмы, а з дапамогай дызель-генератарных агрэгатаў, вынікае з паведамлення Міністэрства энергетыкі, якое спасылаецца на намесніка гендырэктара — галоўнага дыспетчара ДВА “Белэнерга” Дзяніса Кавалёва.

Паводле даных Гомельскага аблвыканкама, 22 ліпеня такіх паселішчаў было 61.

Кавалёў паведаміў, што да 1 жніўня ў краіне плануецца “цалкам перайсці на штатную схему электразабеспячэння”.

У ноч на 19 ліпеня Мінэнерга паведаміла пра “падачу напружання” ва ўсе населеныя пункты Гомельскай вобласці. Ведамства спрагназавала, што на поўнае аднаўленне электрасетак у вобласці спатрэбіцца не менш за месяц.

Аднак на селектарнай нарадзе ў той жа дзень Аляксандр Лукашэнка заявіў, што “месяц, магчыма, гэта зашмат” і “энергетыкаў трэба падціснуць”.

Непагадзь 13 і 14 ліпеня ў Беларусі прывяла да маштабных пашкоджанняў у сістэме электраперадачы, парушэнняў водазабеспячэння, разбурэнняў. Найбольш ад ураганнага ветру пацярпела Гомельская вобласць, дзе ўводзілі рэжым надзвычайнай сітуацыі.

Паводле інфармацыі МНС, у тыя дні праз непагадзь загінула шэсць чалавек.