Праваабаронцы прызналі палітвязнямі яшчэ 7 чалавек

26 ліпеня, Позірк. Беларуская праваабарончая супольнасць прызнала палітвязнямі яшчэ 7 чалавек, цяпер іх у Беларусі 1.387, вынікае з сумеснай заявы на сайце цэнтра “Вясна”.

Адпаведны статус атрымалі змешчаныя пад варту паводле арт. 361⁴ Крымінальнага кодэкса Юрый Лагадзюк,Таццяна Францкевіч, Наталля Лабацэвіч, асуджаныя на невядомы тэрмін паводле гэтага ж артыкуле Ігар Жывалун.

Таксама ў спіс уключаныя Наталля Левая (асуджаная на шэсць гадоў калоніі паводле ч. 2 арт. 361¹, арт. 361², ч. 2 арт. 361³), узятыя пад варту Алеся Дзярнакоўская (арт. 361²) і Аляксандр Сырыца (арт. 361¹ і 368).

Праваабаронцы патрабуюць ад уладаў неадкладна вызваліць усіх палітвязняў, перагледзець палітычна матываваныя выракі і спыніць рэпрэсіі.

Апрача “Вясны” заяву падпісалі “Прававая ініцыятыва”, Беларускі ПЭН, Офіс па правах людзей з інваліднасцю, Беларускі Хельсінкскі камітэт, Беларускі дом правоў чалавека імя Барыса Звозскава, Human Constanta і Lawtrend.

Даведка “Позірку”:

• арт. 361¹ — стварэнне экстрэмісцкага фарміравання або ўдзел у ім;
• арт. 361² — фінансаванне экстрэмісцкай дзейнасці;
• арт. 361³ — удзел на тэрыторыі замежнай дзяржавы ва ўзброеным фарміраванні або ўзброеным канфлікце, ваенных дзеяннях, вярбоўка або падрыхтоўка асоб да такога ўдзелу;
• арт. 361⁴ — садзейнічанне экстрэмісцкай дзейнасці;
• арт. 368 — абраза прэзідэнта.