31 ліпеня, Позірк. Кіраўнікам сельскагаспадарчых арганізацый “рэкамендавана ўстараніць каля 3,8 тыс. парушэнняў патрабаванняў па ахове працы”, выяўленых з пачатку ўборачнай кампаніі, паведамляе прэс-служба Міністэрства працы і сацыяльнай абароны.
Паводле інфармацыі ведамства, парушэнні былі знойдзеныя па выніках маніторынгаў, праведзеных “мабільнымі групамі” з ліку прадстаўнікоў Дэпартамента дзяржінспекцыі працы і мясцовых улад.
Сярод асноўных парушэнняў — незабеспячэнне работнікаў сродкамі індывідуальнай абароны, неабсталяванне размеркавальных шаф, шчытоў кіравання падлогавых збожжасушыльных установак замкамі, эксплуатацыя транспартных сродкаў і іншага абсталявання без ахоўных агародж частак, якія рухаюцца (круцяцца), адсутнасць прыстасаванняў для ачысткі працоўных органаў машын.
З-за парушэнняў прыпынялася праца 200 станкоў, машын і іншага вытворчага абсталявання, эксплуатацыя якіх “стварала пагрозу жыццю і здароўю работнікаў”, падкрэслівае Мінпрацы.
539 чалавек адхіляліся ад працы з прычыны “неправядзення інструктажоў, медыцынскіх аглядаў, адсутнасці сродкаў індывідуальнай абароны”.
У аграпрамысловым комплексе, паводле матэрыялаў Камітэта дзяржкантролю і Генпракуратуры, “цэлы букет рознага роду парушэнняў: крадзяжы, карупцыя, прыпіскі, негатоўнасць тэхнікі і зернесушыльных комплексаў і іншыя”, заявіў Аляксандр Лукашэнка 19 ліпеня на селектарнай нарадзе з прадстаўнікамі сваёй адміністрацыі, урада, мясцовых улад.
Злачынствам ён назваў негатоўнасць “нават аднаго камбайна ці сушылкі”: “Патрэбна высокая арганізацыя работ, добрая матывацыя аграрыяў і жалезная дысцыпліна. Пакуль — нават тое, што я бачу няўзброеным вокам, — мы гэтага не маем”.
