Распачата спецвытворчасць у дачыненні да былога амапаўца Кулажанкі і былога ваеннага Пацехіна

1 жніўня, Позірк. Пра пачатак спецыяльнай крымінальнай вытворчасці супраць былога супрацоўніка АМАП Паўла Кулажанкі і былога ваеннага Віталя Пацехіна паведаміў 1 жніўня Следчы камітэт у спецыялізаваным тэлеграм-канале.

Спецвытворчасць у дачыненні да абодвух распачатая 31 ліпеня.

Кулажанка, які ваюе на баку Украіны ў палку Каліноўскага, абвінавачваецца паводле ч. 3 арт. 289, ч. 1 арт. 14 і ч. 1 арт. 290⁴, ч. 1 арт. 290⁵, ч. 2 арт. 295³, ч. 1 арт. 357, ч. 1 і 2 арт. 361⁴, Пацехін — паводле ч. 3 арт. 289, ч. 1 арт. 14 і ч. 2 арт. 290⁴, ч. 2 арт. 290⁵, ч. 2 арт. 295³ Крымінальнага кодэкса. Яго лічаць выканаўцам атакі дрона на базу АМАПа восенню 2021 года, адказнасць за якую на сябе ўзяла арганізацыя “Буслы ляцяць”.

Абодвум прапанавана з’явіцца ва ўпраўленне Следчага камітэта па Мінску.

Даведка “Позірку”:

арт. 14 КК — замах на злачынства;

арт. 289 — акт тэрарызму;

арт. 290⁴ — стварэнне арганізацыі для ажыццяўлення тэрарыстычнай дзейнасці альбо ўдзел у ёй;

290⁵ — арганізацыя дзейнасці тэрарыстычнай арганізацыі і ўдзел у дзейнасці такой арганізацыі;

295³ — незаконныя дзеянні ў дачыненні да прадметаў, паражальнае дзеянне якіх заснаванае на выкарыстанні гаручых рэчываў;

357 — змова ці іншыя дзеянні, учыненыя з мэтай захопу або ўтрымання дзяржаўнай улады неканстытуцыйным шляхам;

361⁴ — садзейнічанне экстрэмісцкай дзейнасці.

Спецыяльная вытворчасць — вытворчасць па крымінальнай справе ў дачыненні да абвінавачанага, які знаходзіцца па-за межамі Беларусі і ўхіляецца ад яўкі ў орган, што вядзе крымінальны працэс. Магчымая па 34 складах злачынстваў, якія пераважна ставяцца да катэгорыі цяжкіх і асабліва цяжкіх. Сярод іншага гэта акт тэрарызму, генацыд, найміцтва, здрада дзяржаве, дыверсія, стварэнне экстрэмісцкага фарміравання альбо ўдзел у ім, масавыя беспарадкі, заклікі да санкцый і інш.

Першыя спецвытворчасці былі распачатыя 26 верасня 2022 года. Колькасць грамадзян, у дачыненні да якіх яна была ўжытая, дасягнула 112.