У Мінску можна будзе загадзя забраніраваць месца на платнай паркоўцы

5 жніўня, Позірк. У Мінску плануецца стварыць сайт, дзе можна будзе загадзя забраніраваць і аплаціць месца на платнай паркоўцы або паскардзіцца на аўтахлам. Пра гэта паведаміў прэс-службе сталічнага выканкама генеральны дырэктар дзяржаўнага аб’яднання “Гаражы, аўтастаянкі і паркоўкі” Андрэй Зыранаў.

Паводле слоў чыноўніка, мяркуецца, што лічбавая платформа будзе ўключаць некалькі сэрвісаў, у іх ліку платныя паркоўкі, аўтастаянкі, паркінгі, захоўванне транспартных сродкаў, якія парушылі правілы дарожнага руху.

“На сайце можна будзе пакінуць заяўку на неэксплутаваны транспартны сродак, калі вы бачыце такі. Будзе і магчымасць зарэзерваваць месца і на платнай паркоўцы, і на стаянцы, якая ахоўваецца. Адразу ж аплаціць, убачыць навігацыю, прыехаць на гэтае месца, і інспектар паркоўкі адразу будзе бачыць, што гэтае месца аплачана”, — сказаў Зыранаў.

Акрамя таго, на сайце можна будзе ўбачыць, на якую штраф-стаянку павезлі аўтамабіль, калі ён быў прыпаркаваны ў неналежным месцы.

Калі сэрвіс пачне працу, чыноўнік не ўдакладніў.