У Віцебску з цяжкай траўмай экстрана шпіталізаваны школьнік-футбаліст

5 жніўня, Позірк. У Віцебску з цяжкай траўмай экстрана шпіталізаваны школьнік-футбаліст, вынікае з прэс-рэлізаў Міністэрства аховы здароўя і Мінспорту.

У сувязі з паступленнем у абласную бальніцу школьніка, які атрымаў цяжкую траўму падчас трэніроўкі па футболе, вечарам у Віцебску адбудзецца “рэспубліканскі кансіліум з удзелам вядучых нейрахірургаў, спецыялістаў кафедр неўралогіі і нейрахірургіі, анестэзіялогіі і рэанімацыі рэспубліканскага ўзроўню”, паведаміла Міністэрства аховы здароўя.

На кансіліуме будзе разгледжана пытанне “аб прымяненні розных сучасных методык лячэння” школьніка, які пацярпеў на занятках у спецыялізаванай дзіцяча-юнацкай школе алімпійскага рэзерву “Камсамолец”.

Паводле інфармацыі міністэрства, хлопчык знаходзіцца ў рэанімацыі, стан цяжкі. Праводзіцца “медыкаментознае лячэнне ў сувязі з цяжкай чэрапна-мазгавой траўмай, ударам галаўнога мозгу, пераломам асновы чэрапа, ударам грудной клеткі.”

На дапамогу калегам для правядзення кансіліума і надання неабходнай меддапамогі ў Віцебск выехалі “спецыялісты рэспубліканскага ўзроўню: дзіцячы рэаніматолаг Інстытута павышэння кваліфікацыі і перападрыхтоўкі кадраў аховы здароўя БДМУ Уладзімір Волкаў і дзіцячы нейрахірург з РНПЦ неўралогіі і нейрахірургіі Кевін Фернанда Венегас”.

Мінспорту паведаміла, што кіраўніцтва ведамства “ўважліва сочыць за надзвычайнай сітуацыяй, што здарылася ў Віцебску”, “абставіны траўмавання спартсмена — навучэнца аддзялення футбола навучальна-спартыўнай установы “Спецыялізаваная дзіцяча-юнацкая школа алімпійскага рэзерву “Камсамолец” г. Віцебска” падчас заняткаў у паветраапорным манежы ВЦСК (Віцебскі цэнтральны спартыўны комплекс. — “Позірк”.) (пр-т Люднікава, 12) высвятляюцца”.