Мінабароны Літвы прапануе не прымаць у апалчэнне асоб з беларускім грамадзянствам

12 жніўня, Позірк. Не прымаць у Літоўскі саюз стралкоў (ЛСС) асоб з расійскім і беларускім грамадзянствам прапанавала Міністэрства абароны гэтай балтыйскай краіны, паведамляе партал lrt.lt са спасылкай на інфармагенцтва BNS.

Адзначаецца, што адпаведнае новаўвядзенне змяшчаецца ў падрыхтаваных ведамствам папраўках у закон аб ЛСС. Мінабароны прапануе дапоўніць закон палажэннем аб тым, што “стралком не можа быць асоба, чые якасці, дзейнасць, сувязі або звязаныя з ім абставіны несумяшчальныя з інтарэсамі нацыянальнай бяспекі”.

Папраўкі таксама прадугледжваюць немагчымасць прыёму ў ЛЛС асоб, якія набылі грамадзянства замежнай дзяржавы, якая прадстаўляе пагрозу бяспецы Літвы. Спіс такіх дзяржаў будзе зацвярджацца ўрадам.

“З’явіцца магчымасць ацэньваць дзейнасць, сувязі, адносіны або іншыя спадарожныя абставіны стралкоў або прэтэндэнтаў, якія ўплываюць або могуць паўплываць на іх аўтарытэт, адданасць літоўскай дзяржаве, уразлівасць або бездакорную рэпутацыю, што стварае рызыку для бяспекі Саюза стралкоў або устаноў, супрацоўнічаюць з ім, або для інтарэсаў нацыянальнай бяспекі”, — заявіў міністр абароны Літвы Лаўрынас Кашчунас.

Паводле слоў намесніка кіраўніка ЛСС Гедымінаса Латвіса, якія прыводзяцца ў публікацыі, “цяжка ўявіць сабе службу ў Літоўскім саюзе стралкоў або ўдзел у ваенных вучэннях літоўскіх грамадзян, якія маюць грамадзянства варожай дзяржавы”.

У студзені гэтага года ўрад Літвы зацвердзіў спіс краін, у якія вайскоўцам і службовым асобам забаронена выязджаць па меркаваннях нацыянальнай бяспекі. У яго ўвайшлі тры краіны — Беларусь, Кітай і Расія.

ЛСС — літоўская непалітычная грамадская ваенізаваная арганізацыя, асаблівая структура пад кіраваннем урада Літвы. Фактычна з’яўляецца арганізаваным апалчэннем, якое заклікана навучаць грамадзянскае насельніцтва самаабароне і вядзенню пры неабходнасці партызанскай вайны, зборы даных і грамадзянскай супраціву. Таксама на арганізацыю ўскладзеныя задачы падтрымкі органаў правапарадку, аховы краю і мясцовага самакіравання.

Паводле даных ЛСС, у цяперашні час арганізацыя налічвае больш за 16 тыс. членаў.