Вярхоўны суд разгледзіць скаргу на прысуд экс-журналістцы Алене Цімашчук

13 жніўня, Позірк. Вярхоўны суд 16 жніўня разгледзіць скаргу на прысуд экс-журналістцы Алене Цімашчук, паведамляе Беларуская асацыяцыя журналістаў.

Слуханне запланавана на 9.30. Весці яго будзе суддзя Сяргей Гураў.

Брэсцкі абласны суд 3 чэрвеня прыгаварыў Цімашчук да пяці гадоў пазбаўлення волі. Акрамя таго, суддзя Дзмітрый Карасінскі аштрафаваў экс-журналістку на 46 тыс. рублёў.

Цімашчук прызналі вінаватай паводле арт. 369¹ (дыскрэдытацыя Рэспублікі Беларусь), ч. 3 арт. 130 (распальванне расавай, нацыянальнай, рэлігійнай або іншай сацыяльнай варожасці або варажнечы) і ч. 3 арт. 361¹ (стварэнне экстрэмісцкага фарміравання або ўдзел у ім) Крымінальнага кодэкса.

Журналістка працавала ў дзяржаўнай газеце “Брэсцкі веснік” і тэлерадыёкампаніі “Брэст”, як фрылансер супрацоўнічала з рэгіянальнымі выданнямі “Вячэрні Брэст”, “Брэсцкі кур’ер”, “Брэсцкая газета”, інтэрнэт-выданнем “Віртуальны Брэст” і “Брэсцкім зялёным парталам”.

13 чэрвеня Беларуская праваабарончая супольнасць прызнала Цімашчук палітзняволенай.

Паводле звестак БАЖ, зараз у зняволенні знаходзяцца 37 журналістаў і іншых прадстаўнікоў медыясектара.

Цяпер у Беларусі 1.384 чалавек, якіх праваабарончая супольнасць прызнае палітвязнямі. Рэальная колькасць людзей, якія зазналі рэпрэсіі ў той ці іншай форме, значна большая.