Ціханоўская не выключыла пратэстаў у Беларусі ў выпадку смерці Лукашэнкі і спробы прызначыць яго пераемніка
14 жніўня, Позірк. Дэмакратычны лідар Святлана Ціханоўская не выключыла пратэстаў у Беларусі ў выпадку смерці Аляксандра Лукашэнкі і спробы прызначыць яго пераемніка.
“Сцэнараў можа быць шмат, — адзначыла яна ў інтэрв’ю DW. — Можа быць, нейкі вайсковец абвесціць сябе [прэзідэнтам]. Палітычная сітуацыя ў краіне можа змяніцца толькі шляхам сумленных і свабодных выбараў, калі палітвязні будуць вызваленыя. Сярод іх шмат лідараў, якіх беларусы хочуць бачыць сваім прэзідэнтам”.
Ціханоўская таксама лічыць, што рэжым “менш кансалідаваны, чым гэта можа здацца”.
“Можа здацца, што ўсе [чыноўнікі] лаяльныя, але сістэма выбудаваная на страху, і людзі хочуць пазбавіцца гэтага страху. І ў асноўным у рэгіёнах кіруюць тэхнакраты, якія ў момант пераменаў будуць казаць, што заўсёды былі за дэмакратычную Беларусь. Калі б была сітуацыя, падобная, як у Расіі з Прыгожыным, ніхто б не рушыў абараняць уладу”, — упэўненая Ціханоўская.
Таксама дэмлідар выказала меркаванне з нагоды наратыву прапаганды аб тым, што ў выпадку змены ўлады ў Беларусі над тымі, хто працаваў з Лукашэнкам, пачнецца расправа, “перавешваюць на слупах”.
“Панясуць пакаранне тыя, хто здзяйсняў цяжкія злачынствы ў дачыненні да беларусаў, паколькі павінна быць прававая дзяржава”, — сказала палітык. З нагоды астатніх яна заявіла: “Нам усім жыць у адной краіне і працаваць у гэтай краіне на яе карысць. Таму ўсе будуць патрэбныя”.
Яна ўпэўненая, што выхадам з крызісу можа стаць з’яўленне з боку ўлады чалавека, які прапануе дамаўляцца. Пад гэтым Ціханоўская разумее вызваленне палітвязняў і пачатак расследавання злачынстваў рэжыму.
Пра свой мандат, пра які ідуць спрэчкі ў дэмакратычным руху, палітык заявіла, што ён “не абумоўлены часам, а абумоўлены мэтай”, пад якой яна разумее правядзенне дэмакратычных выбараў прэзідэнта краіны.
Ціханоўская адзначыла, што цяпер яе задача — “заразіць Беларуссю” новых лідараў, якія з’яўляюцца ў краінах ЕС; яна імкнецца растлумачыць, што дэмакратычная Беларусь важная для бяспекі Еўропы, што Беларусь і рэжым, які ўсталяваўся ў ёй, — гэта не адно і тое ж.