У дзіцячым аздараўленчым цэнтры 37 чалавек захварэла на норавірусную інфекцыю, 8 шпіталізавана

16 жніўня, Позірк. У дзіцячым рэабілітацыйна-аздараўленчым цэнтры “Колас” у Кобрынскім раёне Брэсцкай вобласці сярод дзяцей і выхавацеляў зарэгістравана 37 выпадкаў захворвання на норавірусную інфекцыю, паведамляе Міністэрства аховы здароўя.

Паводле інфармацыі ведамства, захварэлі 33 падлеткі і 4 выхавальнікі. Было шпіталізавана 8 чалавек, большасць ужо выпісана з бальніцы. Агулам у цэнтры знаходзіцца 587 чалавек.

Першыя выпадкі захворвання былі зарэгістраваныя ў першы дзень новай змены сярод дзяцей, якія прыбылі на аздараўленне. Далей інфекцыя распаўсюдзілася ў калектыве кантактна-бытавым шляхам. Адмоўныя вынікі лабараторных даследаванняў супрацоўнікаў харчаблока, навакольнага асяроддзя, у тым ліку прадуктаў харчавання, выключаюць харчовы шлях перадачы, звязаны з арганізацыяй харчавання на аб’екце, адзначае міністэрства.

Санітарна-эпідэміялагічная служба сумесна з інфекцыяністамі праводзіць неабходны комплекс лячэбных і супрацьэпідэмічных мерапрыемстваў.

Наравірусная інфекцыя — вострая кішачная інфекцыя, узбуджальнікам якой з’яўляецца адна з разнавіднасцяў энтэравірусаў, норавірус сямейства Calviviridae.

Крыніца інфекцыі — хворыя на клінічна выяўленыя (70%) і бессімптомныя (30%) формы.

Асноўныя сімптомы норавіруса: галавакружэнне; млоснасць і частыя ваніты; кашаль, пяршэнне, катар; высокая тэмпература; боль у цягліцах, галаўны боль, ліхаманка, ламота, моцныя дрыжыкі; ўздуцце, буркатанне, хваравітасць жывата; дыярэя.