5 верасня, Позірк. Офіс Святланы Ціханоўскай “рашуча асуджае” серыю актаў вандалізму ў Вільнюсе, скіраваную “супраць беларускіх арганізацый і ўстаноў”.
“Абстрэлы вокнаў храма беларускага праваслаўнага прыхода, разбітыя шыбы Цэнтра беларускай культуры, абразлівыя надпісы каля шэлтара для ўцекачоў “Дапамога” — гэта агрэсіўная акцыя з мэтай запалохаць свабодалюбных беларусаў і беларусак, якія знайшлі прытулак у Літве”, — гаворыцца ў заяве, апублікаванай у тэлеграм-канале палітыка.
Гэтыя дзеянні, лічыць Офіс Ціханоўскай, скіраваныя на тое, “каб пасеяць варожасць паміж беларусамі і літоўцамі”. “Мы ўпэўненыя, за гэтым стаіць рэжым Лукашэнкі, які пастаянна спрабуе стварыць атмасферу страху і нянавісці ў беларускім грамадстве і ў суседніх краінах”, — адзначана ў дакуменце.
Палітычная структура заклікала літоўскія ўлады правесці грунтоўнае расследаванне гэтых нападаў і прыцягнуць вінаватых да адказнасці. Беларусам у выгнанні Офіс Ціханоўскай параіў быць пільнымі, дбаць пра бяспеку і падтрымліваць адзін аднаго.
Уначы 5 верасня антыбеларускі надпіс з’явіўся каля вільнюскага шэлтара “Замак”, які належыць зарэгістраванай у Літве беларускай арганізацыі “Дапамога”.
У ноч на 4 верасня невядомыя абстралялі з пнеўматычнай зброі памяшканне, дзе праводзіць службы беларускі прыход Канстанцінопальскага патрыярхата ў Вільнюсе. Парафіяльны дом знаходзіцца на вул. Бокшта ў гістарычным цэнтры літоўскай сталіцы. У будынку пашкоджана шкло. Паліцыя праводзіць расследаванне.
У той жа дзень невядомыя разбілі шыбы ў вокнах размешчанага ў Вільнюсе Цэнтра беларускай культуры і супольнасці.
У ноч на 28 ліпеня на будынку беларускай крамы сувеніраў “Кропка” ў Вільнюсе невядомыя пакінулі надпіс на літоўскай мове “Вяртайцеся дадому, беларускія свінні” і таксама разбілі шкло.
20 сакавіка літоўская паліцыя пачала расследаванне па факце выяўлення на дарожным паказальніку ля ўезду ў Вільнюс на Мінскай шашы “надпісаў на кірыліцы з выявай беларускага гістарычнага сцяга”.
