16 верасня, Позірк. Беспілотнік з дзвюма скрынкамі беларускіх цыгарэт NZ Gold (агулам тысяча пачкаў) упаў у 400 м ад мяжы Літвы з Беларуссю пасля таго, як літоўскія памежнікі ўжылі антыдронавую прыладу. Пра гэта паведаміла 16 верасня Служба аховы дзяржаўнай мяжы Літвы (САДМ).
Адзначаецца, што дрон, кірунак руху якога ўдалося змяніць, быў першапачаткова заўважаны памежным нарадам ля вёскі Бержышкай Шальчынінкайскага раёна.
На пачатку лета САДМ паведамляла пра няўдалую спробу таемна пераправіць кантрабандны груз цыгарэт з Беларусі ў Літву (1.250 пачкаў) з дапамогай метэазонду. У ноч на 15 чэрвеня яго адправілі з беларускай тэрыторыі ў бок вёскі Памурынэ. Аб’ект, які ляцеў, выявілі з дапамогай прыбора начнога бачання. Метэазонд прызямліўся не ў пункце прызначэння, а проста на тэрыторыі пункта пропуску Шальчынінкай (з беларускага боку Беняконі).
Шальчынінкайскі раён Вільнюскага павета мяжуе з Ашмянскім, Іўеўскім і Воранаўскім раёнамі Гродзенскай вобласці.
Выкарыстанне БПЛА ў Беларусі грамадзянскімі асобамі максімальна абмежавана. Перыядычна Дзяржпагранкамітэт паведамляе аб іх затрыманні ў памежжы.
Аўтарызавацца
Забыліся пароль?
Выхад з профілю
