19 верасня, Позірк. Дэпутаты Еўрапарламента (ЕП) на сесіі ў Страсбургу (Францыя) 18 верасня абмеркавалі рэзалюцыю аб становішчы палітычных зняволеных у Беларусі.
У праекце дакумента, апублікаваным на сайце ЕП, гаворыцца, што ў Беларусі цяпер налічваецца больш за 1.300 палітвязняў, “часта адвольна затрыманых і змешчаных у небяспечныя для жыцця ўмовы”. Сярод іх ёсць людзі з “сур’ёзнымі захворваннямі і псіхічнымі разладамі, інваліды, ва ўзросце старэйшыя за 60 гадоў або непаўналетнія”. Звяртаецца ўвага, што з 2021 года не менш за шэсць чалавек памерлі ў няволі.
Еўрапарламент нагадвае, што ў сваім дакладзе ад 3 лютага 2023 года Вярхоўны камісар ААН па правах чалавека назваў умовы ўтрымання ў беларускіх месцах зняволення “раўнасільнымі бесчалавечным і прыніжаючым годнасць”. У праекце рэзалюцыі таксама падкрэсліваецца, што палітвязні не атрымліваюць своечасовай і дастатковай медыцынскай дапамогі, абыходзяцца без адвакатаў, некаторыя доўгі час знаходзяцца ў інфармацыйнай блакадзе (інкамунікада).
Папярэдні тэкст дакумента змяшчае інфармацыю пра 78 палітвязняў, памілаваных сёлета. Разам з тым заяўляецца, што “беларускія ўлады працягваюць пераследаваць палітычных зняволеных пасля іх вызвалення, падвяргаючы іх рэгулярным праверкам, нагляду і распачынаючы супраць іх новыя крымінальныя справы”.
Праект рэзалюцыі прадугледжвае патрабаванне “неадкладнага і безумоўнага вызвалення ўсіх палітычных зняволеных, якія ўтрымліваюцца рэжымам Лукашэнкі.
Пасяджэнні ў Еўрапарламенце пачаліся 16 верасня, галасаванне па рэзалюцыі аб сітуацыі з палітвязнямі ў Беларусі запланаванае на 19 верасня.
