Генпракратура загадала “Вайлдбэрыз” зняць з продажу беспілотнікі

1 кастрычніка, Позірк. “Прадстаўленне аб устараненні прычын і ўмоў, якія садзейнічалі рэалізацыі фізічным асобам на гэтай гандлёвай пляцоўцы беспілотных лятальных апаратаў, авіямадэлей і запасных частак да іх” унесла Генпракуратура дырэктару інтэрнэт-магазіна “Вайлдберыз” у Беларусі, паведамляе ведамства 1 кастрычніка.

“Як паказалі вынікі працы мытных органаў, значная частка такіх тавараў паступала ў адрас грамадзянаў Беларусі ў міжнародных паштовых адпраўленнях і пасылках, якія дастаўляюцца кур’ерам і іншымі спосабамі. І падобныя выпадкі не былі адзінкавымі”, — адзначыў начальнік упраўлення ўзаемадзеяння са СМІ Генпракуратуры Дзмітрый Брылёў у відэакаментары, распаўсюджаным ведамствам.

У Генпракуратуры лічаць, што “бескантрольнае распаўсюджванне названай авіяцыйнай тэхнікі здольна аказаць негатыўны ўплыў на забеспячэнне грамадскай бяспекі, паколькі павышае рызыкі яе выкарыстання ў супрацьпраўных мэтах, у тым ліку для парушэння грамадскага парадку, экстрэмісцкай дзейнасці і ўчынення актаў тэрарызму”.

1 красавіка набыў моц указ ад 25 верасня 2023 года № 297 “Аб дзяржаўным уліку і эксплуатацыі грамадзянскіх беспілотных лятальных апаратаў”, якім забараняецца ўвоз, захоўванне, абарот, эксплуатацыя і выраб беспілотнікаў і выкарыстанне паветранай прасторы без належнага дазволу.

Акрамя таго, незаконнае ўтрыманне і выкарыстанне беспілотнікаў у пагранічнай зоне або пагранічнай паласе з’яўляюцца парушэннем пагранічнага рэжыму і прыводзяць да адміністрацыйнай адказнасці (арт. 24.19 КаАП прадугледжвае штраф да 50 базавых велічынь — да 2 тыс. рублёў).

“Вайлдбэрыз” (Wildberries) — найбуйнейшы расійскі маркетплейс. Працуе ў РФ, Беларусі, Казахстане, Кыргызстане, Арменіі, Узбекістане і Кітаі.