Абвінавачаныя ў датычнасці да “тэракту ў Мачулішчах” прыгавораны да розных тэрмінаў пазбаўлення волі, максімальны — 25 гадоў

4 кастрычніка, Позірк. Мінскі гарадскі суд прысудзіў 12 чалавек, якія абвінавачваюцца ў датычнасці да “тэракту ў Мачулішчах” да тэрмінаў ад двух гадоў і трох месяцаў да 25 гадоў пазбаўлення волі ў калоніі, паведамляе прэс-служба Генпракуратуры.

Па справе праходзіла 12 чалавек: Максім Лапацін, Андрэй Сцяпурка, Алег Сычоў, Дзяніс Сакалоў, Аляксандр Азараў, Яўгенія Тачыцкая, Міхаіл Дзёмін, Сяргей Лапароў, Анастасія Пілько, Віталь Якуцік, Ала Яцута і Мікалай Швец.

Частка з іх (Азараў, Тачыцкая, Лапароў, Якуцік, Яцута, Дзёмін, а таксама ўкраінскі дыверсант Швец, перададзены Украіне) не знаходзіцца ў Беларусі.

Швеца, Азарава, Якуціка і Дзёміна прызналі вінаватымі па артыкулах аб акце тэрарызму (ч. 3 арт. 289 КК), наўмысным прывядзенні ў непрыдатнасць сродку паветранага транспарту (ч. 4 арт. 309 КК).

Таксама Азарава, Дзёміна, Якуціка, Сакалова, Тачыцкую, Лапаціна і Лапарова прызналі вінаватымі ў здрадзе дзяржаве (ч. 1 арт. 356), а Швяца, Алу Яцуту і Алега Сычова ў агентурнай дзейнасці (арт. 358¹ КК). Швец таксама прызнаны вінаватым у праходжанні навучання і іншай падрыхтоўкі для ўдзелу ў тэрарыстычнай дзейнасці (арт. 290³ КК), а таксама незаконным абароце выбуховых рэчываў і выбуховых прыстасаванняў (ч. 4 арт. 295).

Акрамя таго Якуцік, Сакалова, Сцяпурка, Пілько, Лапаціна, Тачыцкая, Лапарова і Сычова прызнаны вінаватымі ў фінансаванні тэрарыстычнай і экстрэмісцкай дзейнасці, удзеле ў экстрэмісцкім фарміраванні, а таксама ў актыўным удзеле ў дзеяннях, якія груба парушаюць грамадскі парадак, “у розных спалучэннях.

У выніку Швецу завочна прызначылі 25 гадоў пазбаўлення волі ў калоніі, іншым фігурантам справы — ад 15 да 25 гадоў пазбаўлення волі. Паведамляецца, што іншым абвінавачаным, якія з’яўляюцца “саўдзельнікамі”, прызначана пакаранне ў выглядзе пазбаўлення волі на тэрмін ад двух гадоў і трох месяцаў да 15 гадоў.

Справу аб дыверсіі ў Мачулішчах пачалі разглядаць 19 жніўня.

Яго фігурантаў сукупна абвінавачвалі паводле 11 артыкулаў Крымінальнага кодэкса.

Суд адбываўся ў закрытым рэжыме.

8 жніўня стала вядома, што над кіраўніком аб’яднання былых супрацоўнікаў сілавых структур ByPol ​​Аляксандрам Азаравым 19 жніўня пачнецца новы завочны суд. На пытанне “Позірку”, ці звязаны ён з дыверсіяй, Азараў адказаў: “Хутчэй за ўсё”.

У ліпені 2023 года Азараў паведаміў, што пашкоджанне на ваенным аэрадроме Мачулішчы пад Мінскам рэдкага і дарагога расійскага самалёта далёкага радыёлакацыйнага выяўлення і кіравання А-50 было аперацыяй ByPol ​​і Службы бяспекі Украіны (адбылося 26 лютага 2023 года).

Першапачаткова ByPol ​​заявіў, што гэта вынік аперацыі ўдзельнікаў плана “Перамога”, якія выкарыстоўвалі дроны-камікадзэ і пасля аперацыі пакінулі Беларусь.

КДБ паведаміў пра затрыманне больш за 20 чалавек, у тым ліку нібыта непасрэднага выканаўцу Швеца, які быў названы агентам украінскай спецслужбы. Ведамства заявіла, што фігурантам крымінальнай справы аб нападзе на самалёт прад’яўлена абвінавачанне паводле ч. 3 арт. 289 КК.

Кіраўнік СБУ Васіль Малюк публічна прызнаў датычнасць службы да дыверсіі 25 сакавіка 2024 года.

У чэрвені гэтага года асуджаны Швец быў абменены на мітрапаліта Ёнатана (Анатоль Ялецкіх), які належыць да забароненай пасля пачатку вайны Украінскай праваслаўнай царквы Маскоўскага патрыярхата. Ва Украіне ён адбываў тэрмін за апраўданне расійскай агрэсіі.