Вышэйшая кантрольная палата Польшчы заявіла аб адсутнасці прававой базы для візавай праграмы Poland Business Harbour
10 кастрычніка, Позірк. Падчас праверкі ў МЗС Польшчы Вышэйшая кантрольная палата (ВКП) выявіла амаль 50 парушэнняў, якія датычацца механізму выдачы віз падчас знаходжання ва ўладзе ў краіне кааліцыі правых сіл (2018–2023 гг.). Пра гэта, паводле звестак беларускай службы Польскага радыё, заявіў на прэс-канферэнцыі 10 кастрычніка міністр замежных спраў Радаслаў Сікорскі.
Дыпламат адзначыў, што “шакаваны маштабам парушаных працэдур”.
Паводле яго слоў, цяперашняе кіраўніцтва МЗС працуе над устараненнем урону.
У ліку іншага ВКП адзначыла ў сваёй справаздачы, апублікаванай 10 кастрычніка, “адсутнасць прававой базы” для рэалізацыі праграмы Poland Business Harbour (РВН).
Праграма была створана ў верасні 2020 года з мэтай прыцягнення ў Польшчу ІТ-спецыялістаў і кампаній з Беларусі, а затым была пашырана на такія краіны, як Грузія, Расія, Украіна, Малдова і Арменія.
Намеснік дырэктара Усходняга дэпартамента МЗС Польшчы Ганна Костшава-Мішталь 20 верасня 2023 года на III Беларускім бізнес-форуме ў Варшаве паведаміла, што за тры гады ў рамках PBH было выдадзена амаль 90 тыс. віз.
У студзені гэтага года стала вядома, што Сікорскі прыняў рашэнне прыпыніць удзел МЗС у праграме РВН да таго часу, пакуль не будуць прыняты рашэнні, якія гарантуюць “належную праверку кампаній і замежнікаў, якія з’яўляюцца яе ўдзельнікамі”.
Паводле ацэнкі міністэрства, праграма “не апраўдала ўскладзеных на яе надзей”. “Сярод іншага, у грамадскай прасторы выказваліся сумненні наконт выкарыстання віз, выдадзеных у рамках праграмы, у мэтах, якія не адпавядаюць яе прынцыпам”, — адзначылі ў МЗС.
У справаздачы ВКП адзначаецца, што мэтай выяўленых палатай злоўжыванняў было павелічэнне колькасці выдаваных віз “у тым ліку тым, хто наогул не павінен быў іх атрымаць”. Размова ідзе ў тым ліку, аб грамадзянах Расійскай Федэрацыі.
Так званы “візавы скандал” разгарэўся ў Польшчы ў 2023 годзе, калі высветлілася, што многія візы ў асноўным — у Азіі і Афрыцы выдаваліся польскімі замежнымі ўстановамі без належных працэдур і праверак, у тым ліку за хабар.
У матэрыяле Польскага радыё адзначаецца, што ў 2018–2023 гадах Польшча выдала больш за 6 мільёнаў віз, у тым ліку 3,8 мільёна працоўных. Больш за палову з іх атрымалі грамадзяне Украіны, больш за чвэрць — грамадзяне Беларусі. На трэцім месцы грамадзяне Расіі (амаль 6% віз).