43 чалавекі здалі кроў у дзень донара ў РНПЦ дзіцячай анкалогіі

28 красавіка, Позірк. 43 чалавекі здалі кроў у дзень донара, які прайшоў 28 красавіка ў Рэспубліканскім навукова-практычным цэнтры дзіцячай анкалогіі, гематалогіі і імуналогіі ў Бараўлянах (Мінскі раён).

Як паведаміў РНПЦ, усяго ў акцыі ўзяло ўдзел больш за 50 чалавек: агульнабальнічны персанал, маладыя спецыялісты, святары, бацькі пацыентаў і неабыякавыя людзі. 43 з іх паспяхова прайшлі медыцынскі агляд і сталі донарамі.

“Кожная здадзеная доза крыві — гэта бясцэнны дар, які можа выратаваць чыёсьці жыццё, — адзначае РНПЦ. — Здаючы кроў, вы дорыце надзею і магчымасць выздараўлення тым, хто апынуўся ў складанай сітуацыі: пацярпелым у аварыях, тым, хто перанёс аперацыі або змагаецца з цяжкімі хваробамі”.

Анансуючы акцыю, цэнтр адзначаў, што кожны дзень мноства людзей, у тым ліку дзяцей з анкалагічнымі захворваннямі, мае патрэбу ў донарскай крыві для правядзення жыццёва важных працэдур і лячэння. Без гэтай дапамогі “шанцы на выздараўленне значна зніжаюцца”.

У папярэдняй акцыі 28 студзеня ўзяло ўдзел 37 чалавек, з якіх 8 — на бязвыплатнай аснове. Гэта персанал, маладыя спецыялісты, валанцёры, бацькі пацыентаў.

РНПЦ дзіцячай анкалогіі — вядучая ўстанова аховы здароўя Беларусі, у якой лечаць дзіцячы рак.

Хворнасць на рак у краіне складае каля 17 выпадкаў на 100 тыс. дзіцячага насельніцтва, паведаміла на прэс-канферэнцыі 11 лютага намесніца дырэктара РНПЦ, галоўны пазаштатны дзіцячы анкагематолаг Міністэрства аховы здароўя Іна Пралескоўская.

Яна прадэманстравала графік, з якога вынікала, што напрыканцы 1990-х гадоў паказчыкі анкалагічнай хворнасці дзяцей знаходзіліся ў межах 16–17 выпадкаў на 100 тыс., у сярэдзіне 2000-х адзначалася некаторае зніжэнне — да 14–15 выпадкаў, аднак пасля 2010 года прасочваецца ўстойлівы рост. Максімальныя значэнні фіксаваліся ў 2015–2021 гадах, дасягаючы амаль 20 выпадкаў.

Штогод на рак хварэе каля 300 дзяцей. У 2014 годзе такі дыягназ быў пастаўлены ў 297 дзяцей, у 2023-м — у 301, у 2024-м — у 329.

24% выпадкаў раку ў дзяцей у 2024 годзе (115 выпадкаў) было выяўлена на 4-й стадыі хваробы (у 2021-м — 50%).