Прыцягненне Лукашэнкі да адказнасці Латушка абмеркаваў са старшынёй камітэта Бундэстагу па супрацы з ЕС
17 кастрычніка, Позірк. Прыцягненне Аляксандра Лукашэнкі і яго памагатых да адказнасці за міжнародныя злачынствы абмеркаваў намеснік кіраўнцы Аб’яднанага пераходнага кабінета (АПК) Павел Латушка са старшынёй камітэта Бундэстагу па супрацы з ЕС Антонам Хофрэйтарам, паведаміла 17 кастрычніка прэс-служба АПК.
Беларускі палітык прадставіў пазіцыю дэмакратычных сіл па гэтым пытанні, а таксама заявіў пра важнасць падтрымкі звароту Літвы ў Міжнародны крымінальны суд з боку Берліна. Падчас сустрэчы бакі абмеркавалі адвакатаванне Германіяй і іншымі дзяржавамі — членамі МКС разгляду справы супраць Лукашэнкі.
Паводле сцвярджэння АПК, Хофрэйтар прапанаваў правесці шэраг мерапрыемстваў, “скіраваных на факусаванне ўвагі на сітуацыі ў Беларусі” ў рамках сустрэч старшынь камітэтаў па справах ЕС парламентаў краін — членаў саюза. На найбліжэйшым пасяджэнні ён мае намер ініцыяваць абмеркаванне сітуацыі ў Беларусі.
Хофрэйтар, як сцвярджаецца, таксама пагадзіўся с Латушкам, што “не варта прызнаваць выбарамі фарс”, які Лукашэнка плануе арганізаваць у Беларусі ў 2025 годзе.
Прыцягненне Аляксандра Лукашэнкі да адказнасці за здзейсненыя ім злачынствы абмяркоўвалася падчас сустрэчы дэмакратычнага лідара Святланы Ціханоўскай і Паўла Латушкі з міністрам юстыцыі Германіі Марка Бушманам у Берліне 15 кастрычніка. Таксама пытанне падымалася на сустрэчы з “групай сяброў Беларусі” ў Бундэстагу.