У другім туры літоўскіх парламенцкіх выбараў на ўчастку ў Мінску большасць галасоў аддадзеная за кандыдата, які прайграў

29 кастрычніка, Позірк. Міністр эканомікі і інавацый Аўшрыне Арманайтэ (Партыя свабоды) перамагла 27 кастрычніка ў другім туры парламенцкіх выбараў на ўчастку для галасавання ў амбасадзе Літвы ў Мінску, вынікае з праведзенага “Позіркам” аналізу звестак Галоўнай выбарчай камісіі гэтай краіны.

Арманайтэ атрымала 9 галасоў (50%), яе саперніца — прадстаўніца кіруючай кааліцыі Даля Асанавічутэ (Саюз Айчыны — Літоўскія хрысціянскія дэмакраты) — 7 (38,89%).

У галасаванні ўдзельнічала 18 чалавек (яўка 40%), 2 бюлетэні прызнана несапраўднымі. 12 чалавек прыйшлі на ўчастак, 6 даслалі бюлетэнь па пошце.

Па выніках выбараў у замежнай акрузе ў парламент прайшла Асанавічутэ, аднак агулам яе партыя пацярпела паразу і перайшла ў апазіцыю да сацыял-дэмакратаў, якія перамаглі.

У першым туры 13 кастрычніка літоўцы ў Мінску аддалі адносную большасць галасоў Арманайтэ; Асанавічутэ была чацвёртай, другім — Мікас Сакалаўскас (з “Працоўнай партыі”, якая ўваходзіць у “Мірную кааліцыю” левага прарасійскага толку). На выбарах па партыйных спісах у той дзень на ўчастку выйграла прарасійская Літоўская народная партыя, якая агулам не пераадолела 5-працэнтны бар’ер.

У кастрычніку ў Мінску былі таксама адкрыты выбарчыя ўчасткі ў амбасадах Малдовы (20 кастрычніка; першы тур прэзідэнцкіх выбараў і рэферэндум аб уключэнні ў Канстытуцыю палажэння аб інтэграцыі ў Еўрасаюз) і Грузіі (26 кастрычніка; парламенцкія выбары).

3 лістапада ў малдаўскай амбасадзе будзе працаваць участак для галасавання ў другім туры прэзідэнцкіх выбараў.