На тэрыторыі Беларусі ў верасні 2025 года пройдуць сумесныя вучэнні АДКБ
30 кастрычніка, Позірк. На тэрыторыі Беларусі ў верасні 2025 года пройдуць сумесныя вучэнні АДКБ, паведаміў міністр абароны Віктар Хрэнін на сустрэчы з генеральным сакратаром арганізацыі Імангалі Тасмагамбетавым.
Як адзначае прэс-служба Мінабароны, вучэнні пройдуць у тры этапы. Першы будзе называцца “Узаемадзеянне-2025”, другі — “Пошук-2025”, трэці — “Эшалон-2025”.
На сустрэчы Хрэнін азнаёміў генеральнага сакратара АДКБ з “бягучай ваенна-палітычнай абстаноўкай ва ўсходне-еўрапейскім рэгіёне калектыўнай бяспекі”, гаворыцца ў паведамленні ведамства.
Таксама ён “праінфармаваў [Тасмагамбетава] аб пазіцыі беларускага боку па пытаннях парадку дня сумеснага пасяджэння Савета міністраў замежных спраў, Савета міністраў абароны, Камітэта сакратароў саветаў бяспекі дзяржаў — членаў АДКБ, якое пройдзе 28 лістапада 2024 года ў Астане”.
“Бакі абмеркавалі асноўныя сферы супрацоўніцтва на пляцоўцы арганізацыі ў бягучым годзе, а таксама магчымыя напрамкі далейшага ўзаемадзеяння”, — адзначылі ў Мінабароны.
28 кастрычніка правядзенне ў Беларусі “сумеснага стратэгічнага вучэння-2025” анансаваў камандуючы Ваенна-паветранымі сіламі і войскамі супрацьпаветранай абароны Узброеных сіл Андрэй Лук’яновіч.
Паводле яго слоў, вучэнні стануць “вынікам баявой падрыхтоўкі”, у рамках якой “запланаваныя аператыўныя тактычныя вучэнні з баявой стральбой як на палігонах Расійскай Федэрацыі, так і на тэрыторыі Рэспублікі Беларусь”.
“Запланаваныя сумесныя лётна-тактычныя вучэнні. Пакуль не буду раскрываць з кім, таму што пацверджання пакуль яшчэ чакаем”, — сказаў Лук’яновіч.
Меркавалася, што гаворка ідзе пра беларуска-расійскія вучэнні “Захад-2025”, аб правядзенні якіх заявіў Хрэнін на пасяджэнні сумеснай калегіі міністэрстваў абароны Беларусі і Расіі 23 кастрычніка ў Мінску. Паводле слоў міністра, яны створаць умовы для “далейшага ўдасканалення дзеючай сістэмы забеспячэння ваеннай бяспекі Саюзнай дзяржавы”.
Арганізацыя Дагавора аб калектыўнай бяспецы — ваенна-палітычны блок, мэтамі якога заяўлены “ўмацаванне міру, міжнароднай і рэгіянальнай бяспекі і стабільнасці, абарона на калектыўнай аснове незалежнасці, тэрытарыяльнай цэласнасці і суверэнітэту дзяржаў-членаў”. У яго ўваходзяць Арменія, Беларусь, Казахстан, Кыргызстан, Расія і Таджыкістан.
Улады Арменіі замарозілі ўдзел краіны ў АДКБ і загаварылі аб магчымым выхадзе з блока. Ерэван абвінаваціў арганізацыю ў бяздзейнасці падчас карабахскага канфлікту з Азербайджанам, а асобных членаў — у тым, што яны “планавалі вайну” супраць Арменіі разам з Баку. Акрамя таго, армянскі прэм’ер-міністр Нікол Пашынян заявіў, што ні ён, ні які-небудзь іншы афіцыйны прадстаўнік краіны не паедзе ў Беларусь, пакуль ва ўладзе ў Менску знаходзіцца Лукашэнка — з-за заяваў апошняга аб згаданым канфлікце на сустрэчы з прэзідэнтам Азербайджана Ільхамам Аліевым ў сярэдзіне траўня.