СМІ: Авіякампанія Red Wings адмаўляецца ад рэйсаў з Ульянаўска ў Мінск, прычына — скарачэнне субсідавання (дапоўнена)
Дададзеныя 12–14 абзацы.
10 лістапада, Позірк. Расійская авіякампанія Red Wings са снежня спыняе продаж квіткоў на рэйсы з Ульянаўска ў Мінск, паведамляе “Камерсант”.
Адзначаецца, што рэйсы плануецца адмяніць як мінімум да сакавіка 2025 года.
На сайце перавозчыка апошнім днём продажу квіткоў на гэты маршрут указана 29 лістапада. Кошт пералёту складае 5.617 расійскіх рублёў (каля 57 долараў).
На пытанне выдання аб прычынах спынення продажу квіткоў прэс-служба Red Wings не адказала.
Са спасылкай на свае крыніцы медыя паведамляе, што рэйсы адмяняюцца ў сувязі са скарачэннем бюджэтнага субсідавання.
“Праблема звязаная з тым, што абодва авіярэйсы (гаворка таксама ідзе пра пералёты з Ульянаўская ў Екацярынбург. — “Позірк”.) субсідаваныя, прычым кошт субсідавання авіярэйсу ў Мінск з боку рэгіянальнага бюджэту даволі істотны”, — гаворыцца ў публікацыі.
Заяўляецца, што Беларусь “не мае права субсідаваць замежныя авіякампаніі, у яе няма на гэта адпаведнай заканадаўчай базы”.
Аб’ём субсідавання рэйса ў Мінск і назад складае 1,3 млн расійскіх рублёў (каля 13,3 тыс. долараў).
“Сумы субсідавання з абласнога бюджэту атрымліваліся немалыя, і, паводле маіх звестак, рэгіянальны Мінтранс прыняў рашэнне секвеставаць выдаткі субсідавання мінскага авіярэйсу”, — паведаміла крыніца, знаёмая з сітуацыяй.
Пры гэтым прадстаўнік Мінтранса Ульянаўскай вобласці Юрый Чыбісаў заявіў, што рашэнне аб скасаванні рэйсаў “яшчэ не прынятае”. “Пакуль адменены толькі продаж квіткоў, мы знаходзімся з авіякампаніяй у перамоўным працэсе”, — сказаў ён.
Паводле звестак медыя, авіярэйсы ў Мінск “адназначна спыняюцца як мінімум да сакавіка”, “ідуць перамовы, як захаваць рэйс у Екацярынбург”.
Дзяржаўны сакратар Саюзнай дзяржавы (СД) Дзмітрый Мезенцаў 5 лістапада заявіў, што авіярэйсы паміж Беларуссю і расійскімі рэгіёнамі могуць атрымаць субсідыі з саюзнага бюджэту.
Паводле яго слоў, такія авіязносіны адпавядаюць “запыту мільёнаў людзей”. “Будзем сумесна з [рэгіянальнымі] мінтрансамі адпрацоўваць гэтую мадэль, прапануем яе публічна і, магчыма, на 2026 год выйдзем на этапны пілотны праект па падтрымцы такой працы за кошт саюзнага бюджэту”, — сказаў Мезенцаў у эфіры тэлеканала “Расія 24”.
Чыноўнік адзначыў, што рэйсы, якія злучаюць Мінск з Санкт-Пецярбургам, Махачкалой, Архангельскам, Ульянаўскам і Новасібірскам “даказалі сваю паспяховасць”.
Рэгулярныя авіязносіны паміж Мінскам і Ульянаўскам былі адкрытыя Red Wings 1 чэрвеня. Паводле слоў кіраўніка гэтага рэгіёну РФ Аляксея Рускіх, маршрут арганізаваны па выніках дамоўленасці з Аляксандрам Лукашэнкам падчас сустрэчы ў 2023 годзе.
Рускіх падкрэсліў, што рэйс субсідуецца урадам Ульянаўскай вобласці. “Гэта неабходна для стрымлівання цэн на квіткі”, — удакладніў чыноўнік.
Пералёты па гэтым маршруце (адлегласць складае 1,4 тыс. км) выконваюцца раз у тыдзень. Час у дарозе — 2,5 гадзіны.
Ульянаўск стаў пятым расійскім горадам, адкуль самалёты Red Wings лётаюць у Мінск. Раней былі арганізаваныя рэйсы з Архангельска, Уфы, Чэлябінска. Таксама з 1 чэрвеня аднавіліся палёты з Самары.
Памочніка гендырэктара па спецрэйсах Нацыянальнага аэрапорта Мінск Васіль Корнеў заявіў тады, што Ульянаўск стаў 18-м авіянапраўленнем з Расіі ў Беларусь. У тэлеграм-канале аэрапорта ён анансаваў адкрыццё маршрутаў кампаніі Red Wings з Астрахані, Омска, Саратава, Стаўрапаля, аднак гэтыя рэйсы не былі арганізаваныя.
Пра магчымасць адкрыцця ў 2024 годзе рэйса Ульянаўск — Мінск 29 лютага паведаміў на той момант амбасадар Беларусі ў РФ Дзмітрый Круты (цяпер кіраўнік адміністрацыі Лукашэнкі).
Намеснік міністра спорту і турызму Алег Андрэйчык на пленарным пасяджэнні Другога беларуска-расійскага турыстычнага кангрэса 17 красавіка ў Мінску заявіў, што сёння Беларусь звязаная авіязносінамі з 16 расійскімі рэгіёнамі і “гэтага мала”. Міністэрства эканамічнага развіцця РФ, якое вывучала гэтае пытанне, паведаміла, што аб патрэбнасці авіямаршрутаў у Беларусь заявіла больш за 30 расійскіх рэгіёнаў.
Адзначалася, што Федэральнае агенцтва паветранага транспарту (Расавіяцыя) вывучае цікавасць расійскіх авіякампаній па арганізацыі рэйсаў у Гродна.
3 красавіка адкрыліся рэйсы паміж Брэстам і Масквой, 22 сакавіка — паміж Гомелем і Санкт-Пецярбургам, 22 красавіка — паміж Мінскам і Архангельскам, 25 красавіка — паміж Мінскам і Махачкалай, 28 траўня — паміж Мінскам і Мурманскам.