71% жыхароў гарадоў лічыць рост цэн асноўнай прычынай зніжэння даходаў — даследаванне
11 лістапада, Позірк. Асноўнай прычынай скарачэння асабістых даходаў жыхары беларускіх гарадоў лічаць рост спажывецкіх цэн, сведчаць вынікі чарговага штоквартальнага апытання даследчага цэнтра BEROC.
Пра гэта заявіла 70,9% рэспандэнтаў — амаль у паўтара раза больш (50,8%), чым па выніках папярэдняга даследавання, праведзенага ў ліпені.
У першую пяцёрку прычын зніжэння даходаў увайшлі таксама змяненне курсу рубля да замежных валют — 21% (папярэдняе апытанне — 14,6%), памяншэнне колькасці заказаў і кліентаў — 16,6% (18,1%), скарачэнне заробку — 12% (11,2%), скасаванне прэміі — 10,8% (17,3%).
Усяго аб скарачэнні даходаў у трэцім квартале заявіла 26,2% (26%) апытаных.
“Калі мы спытаем у гэтых 26,2%, як яны спраўляюцца са скарачэннем даходаў, то ўбачым, што практычна палова — 45% — эканоміць на вольным часе”, — адзначыла на прэзентацыі вынікаў даследавання эканаміст BEROC Віялета Панасевіч.
Пры гэтым 40% апытаных заявіла аб скарачэнні выдаткаў на ежу, 28% — аб пратэрмінаваных плацяжах, 27% марнуе зберажэнні.
Апытанне праводзілася 8–10 лістапада, удзельнічаў 991 чалавек ва ўзросце 18–64 гадоў.