На фоне санкцый улады маюць намер “пераарыентаваць бізнес на працу з айчынным сэканд-хэндам” — дакумент

Апублікавана на адкрытай версіі “Позірку” 24 снежня 2024 года ў 16:21.

22 снежня, Позірк. “Пераарыентаваць бізнес на працу з айчынным сэканд-хэндам” маюць намер улады ў сувязі з санкцыямі ў дачыненні да гэтай групы тавараў. Гэта вынікае са службовага ліста першага віцэ-прэм’ера Мікалая Снапкова, копію якога “Позірку” перадало аб’яднанне былых сілавікоў BelPol.

Ліст датаваны вераснем 2024 года, ён накіраваны міністру антыманапольнага рэгулявання і гандлю Аляксею Багданаву, міністру адукацыі Андрэю Іванцу, міністру працы і сацыяльнай абароны Наталлі Паўлючэнка, кіраўнікам аблвыканкамаў і Мінгарвыканкама, а таксама старшыні Белкаапсаюза Інэсе Караткевіч і кіраўніку канцэрна “Беллегпрам” Таццяне Лугінай.

Снапкоў “просіць” у дакуменце “прапрацаваць з зацікаўленымі” шэраг пытанняў “ва ўмовах абмежавання экспарту рэчаў “сэканд-хэнд” у Рэспубліку Беларусь і Расійскую Федэрацыю”.

“Зацікаўленымі” віцэ-прэм’ер называе “суб’екты гаспадарання, якія рэалізуюць дадзеную прадукцыю”, Беларускі Чырвоны Крыж, “іншыя грамадскія арганізацыі”, тэрытарыяльныя цэнтры сацыяльнага абслугоўвання насельніцтва, сацыяльна-педагагічныя цэнтры, дамы начнога знаходжання.

Акрамя пераарыентацыі бізнесу, дакумент прапануе “прапрацаваць” пытанні “фарміравання ў насельніцтва культуры ўсвядомленага спажывання і беражлівага выкарыстання рэсурсаў”, “арганізацыі (пашырэння дзеючых) працы буйных складоў (аптовых баз) <…>, якія займаюцца аптовай рэалізацыяй рэчаў “сэканд-хэнд”, узаемадзеяння адпаведных суб’ектаў гандлю з грамадскімі арганізацыямі “ў частцы збору і пераразмеркавання часткі гэтых рэчаў на дабрачынныя мэты”.

Таксама Снапкоў лічыць неабходным падтрымаць “дзеючыя ініцыятывы ТРЦ Galleria Minsk, Mark Formelle, Stradivarius і іншых аб’ектаў па зборы адзення б/к у ў мэтах далейшай перадачы дабрачынным арганізацыям і на другасную перапрацоўку”.

Адрасатам ліста, акрамя іншага, варта “вывучыць і маштабаваць” платформу Zara Pre-owned па аказанні аднайменнай сеткай крам “паслуг рамонту, перапродажу і перадачы ў дар б/к адзення”.

Віцэ-прэм’ер таксама прапануе “прапрацаваць” пытанне “сацыяльнага прадпрымальніцтва ў гэтай сферы з элементамі валанцёрства”, гаворка ідзе пра “збор рэчаў валанцёрамі з магчымасцю ўзнагароджання, пераразмеркаванне рэчаў у гандаль, на дабрачыннасць і перапрацоўку”.

“Аб прапрацоўцы пазначаных пытанняў праінфармуйце ўрад. Тэрмін — да 1 лістапада 2024 года”, — гаворыцца ў дакуменце.

Экспарт у Беларусь былога ва ўжыванні адзення закранае прыняты ў чэрвені пакет санкцый ЕС у дачыненні да афіцыйнага Мінска, дубліруючы шэраг абмежаванняў, раней уведзеных супраць Расіі.

14 жніўня МЗС Беларусі раскрытыкаваў санкцыі на адзенне сэканд-хэнд. Уводзячы такія абмежаванні, Еўрасаюз “не ўлічыў, што беларускі легпрам прапануе сёння найшырэйшы асартымент якасных тавараў — на любы густ і кашалёк”, гаварылася ў заяве ведамства.

Акрамя айчыннай прадукцыі, як адзначалася, “імпарт з дружалюбных краін таксама ніхто не адмяняў”.

У сувязі з гэтым у паведамленні выказана падзяка “дарагім еўрапейскім суседзям” за ўведзеную забарону паставак з Захаду ў Беларусь “прасякнутага фармальдэгідам б/к смецця”, а таксама рэкамендавана даношваць вопратку і самім яе ўтылізаваць.

Пры гэтым заяўлялася пра “цынізм брусэльскіх чыноўнікаў”: “Фактычна Еўрасаюз, які дэкларуе прыхільнасць “сацыяльным прынцыпам” санкцый, ужывае абмежаванні на сацыяльна-значныя тавары, якія карыстаюцца попытам, перш за ўсё, у малазабяспечаных грамадзян”.