Беларусь падвысіла тарыфы ў расійскіх рублях на транспартаванне нафты

17 студзеня, Позірк. Тарыфы на паслугі па транспартаванні нафты па магістральных трубаправодах ААТ “Гомельтранснафта Дружба”, усталяваныя ў расійскіх рублях, павялічаныя на 11%, вынікае з пастановы Міністэрства антыманапольнага рэгулявання і гандлю № 1 ад 15 студзеня.

Згодна з дакументам, апублікаваным 17 студзеня на Нацыянальным прававым інтэрнэт-партале, тарыф на транзіт па маршруце Унеча (Высокае) — Адамава Застава цяпер складае 698,48 расійскага рубля за 1 тону нета (на 12 студзеня 2024 года, калі ў апошні раз змяняліся тарыфы, — 629,26); Унеча (Высокае) — Броды — 239,52 (215,78 на 12 студзеня 2024-га); Унеча (Высокае) — мяжа Беларусі і Украіны — 239,52 (215,78 — на 21 жніўня 2024-га).

Нягледзячы на тое, што ў расійскіх рублях назіраецца рост, у пераліку на долары новыя тарыфы саступаюць старым: па маршруце да Адамавай Заставы — на 3,74% (зніжэнне з 7,0877 да 6,8226), да Бродаў — на 3,74 % (з 2,4305 да 2,3396), да беларуса-ўкраінскай мяжы — на 1,66% (з 2,3792 да 2,3396).

Нафтаправод “Дружба” забяспечвае пастаўкі нафты на беларускія перапрацоўчыя заводы і яе транзіт у Еўропу. Трубаправод пачынаецца ў Самарскай вобласці РФ, праходзіць праз Бранск і далей разгаліноўваецца на два ўчасткі: паўночны і паўднёвы, праходзіць праз Беларусь, Украіну, Польшчу, Чэхію, Славакію, Германію, Венгрыю.