26 студзеня, Позірк. Кіраўнік МЗС Польшчы Радаслаў Сікорскі (муж амерыканскай пісьменніцы Эн Эплбаум, чый твор “ГУЛАГ“, які атрымаў Пулітцэраўскую прэмію, 24 студзеня забараніла беларускае Міністэрства інфармацыі) іранічна выказаўся пра інтрыгу беларускіх выбараў.
“Сёння ў Беларусі “выбары”. Чаканне таго, хто будзе абвешчаны пераможцам, невыноснае“, — напісаў Сікорскі ў “Х“ (раней “Твітар“).
На гэта адрэагавала беларуская амбасада ў Варшаве: “Вынікі выбараў прэзідэнта будуць абвешчаныя Цэнтральнай выбарчай камісіяй на працягу 10 дзён пасля выбараў — не пазней за 5 лютага 2025 года. Крыху цярпення…“
Перад гэтым Сікорскі папрасіў СМІ “па магчымасці” не называць Аляксандра Лукашэнку апошнім дыктатарам Еўропы, “таму што гэта няпраўда”. “У злачынствах, рэпрэсіях і міжнароднай агрэсіі Уладзімір Пуцін яго дагнаў і перагнаў”, — заявіў кіраўнік польскай дыпламатыі.
Еўрапейскі саюз, дзе ў першай палове 2025 года старшынюе Польшча, заявіў аб непрызнанні цяперашніх выбараў у Беларусі.
