Замежнік загінуў падчас неафіцыйнай працы — дырэктар прадпрыемства, які яго наняў, прыгавораны да 5 гадоў абмежавання волі

15 верасня, Позірк. 45-гадовы дырэктар прадпрыемства ў Мінску прызнаны вінаватым паводле ч. 2 арт. 428 КК (службовая халатнасць, якая пацягнула з неасцярожнасці смерць чалавека) і прыгавораны да 5 гадоў абмежавання волі без накіравання ў папраўчую ўстанову адкрытага тыпу, паведаміла 15 верасня прэс-служба Следчага камітэта.

Адзначаецца, што вырак яшчэ не набыў моц.

З інфармацыі ведамства вынікае, што крымінальная справа ў дачыненні да мужчыны звязаная са смерцю 25-гадовага замежнага студэнта.

Згодна з матэрыяламі справы, трое рабочых уначы фарбавалі столі ў падвальным памяшканні на адным з будаўнічых аб’ектаў сталіцы. У пэўны момант адзін з іх — замежны студэнт — сарваўся з рыштаванняў з вышыні трох метраў. Маладога чалавека шпіталізавалі. СК не ўдакладняе, калі гэта здарылася.

Нягледзячы на намаганні ўрачоў, пацярпелы памёр у бальніцы праз некалькі месяцаў пасля здарэння.

Следчыя высветлілі, што дырэктар прадпрыемства знайшоў выканаўцаў аздобных работ праз інтэрнэт. Афіцыйна ён іх не працаўладкаваў. Акрамя таго, як заяўлена, мужчына не стварыў ім бяспечныя ўмовы, не даў неабходнае абсталяванне і сродкі індывідуальнай абароны. Самі работы, падчас якіх пацярпеў чалавек, праводзіліся ўначы і “без належнага кантролю”.

Адзначаецца, што пацярпелы “не праходзіў адпаведнае навучанне, прафесійную падрыхтоўку, інструктажы па ахове працы”, не меў кваліфікацыі маляра. Нягледзячы на гэта, яму было дазволена працаваць на вышыні — “на падмостках без агароджы, ахоўнай каскі і засцерагальнага пояса”.

Паводле інфармацыі СК, замежны студэнт “не меў права прыцягвацца да працы і знаходзіцца на будаўнічым аб’екце”.

Згодна з высновамі эксперта, прычынай смерці маладога чалавека стала тупая траўма галавы і груднога аддзела пазваночніка, якая ўскладнілася ацёкам і дыслакацыяй галаўнога мозгу, а таксама працяглым каматозным станам з развіццём гнойнай бронхапнеўманіі.

Колькасць работнікаў, якія загінулі на вытворчасці, за 10 гадоў павялічылася на 11,1% (з 72 за 2015-ы да 80 за 2025 год), паказаў праведзены “Позіркам” аналіз даных Нацыянальнага статыстычнага камітэта.

У Мінскай вобласці яна вырасла ў 2,6 раза (з 8 да 21), у Гродзенскай — на 20% (з 10 да 12); у Брэсцкай і Віцебскай — не змянілася (11 і 8 адпаведна); у Гомельскай — зменшылася на 23,1% (з 13 да 10), у Мінску — на 20% (з 10 да 8), Магілёўскай вобласці — на 16,7% (з 12 да 10).

У красавіку намеснік міністра працы і сацыяльнай абароны Алег Такун паведаміў, што за апошнія 20 гадоў вытворчы траўматызм у Беларусі скараціўся ў тры разы, смяротны — у два.