Дэпутаты Еўрапарламента: Вызваленне Шарэнды-Панасюк — найважнейшы крок на шляху да ліквідацыі парушэнняў правоў чалавека
Паліна Шарэнда-Панасюк
4 лютага, Позірк. Вызваленне вядомага дзеяча беларускай апазіцыі Паліны Шарэнды-Панасюк — найважнейшы крок на шляху да ліквідацыі парушэнняў правоў чалавека, гаворыцца ў сумеснай заяве старшыні камітэта Еўрапарламента (ЕП) па замежных справах Дэвіда Макалістара, пастаяннага дакладчыка па Беларусі Хельмута Брандштэтара і старшыні дэлегацыі ЕП Малгажаты Гасеўскай.
У заяве адзначаецца, што Шарэнда-Панасюк правяла чатыры гады і адзін месяц у калоніі, “дзе ўтрымлівалася ў невыносных умовах, зазнавала катаванні і бесчалавечнае абыходжанне”.
Прадстаўнікі Еўраарламента, вітаючы вызваленне актывісткі, падкрэслілі сур’ёзную занепакоенасць “з нагоды тысяч беларусаў, кінутых у турмы па палітычных матывах, якія ўтрымліваюцца ў жахлівых умовах, зазнаюць катаванні, пазбаўленыя медычнай дапамогі, абмежаваныя ў зносінах з членамі сям’і і адвакатамі”.
Заяўнікі паўтарылі заклік да ЕС і яго дзяржаў-членаў падтрымаць палітычных зняволеных і іх сем’і, пры любой магчымасці патрабаваць іх неадкладнага і безумоўнага вызвалення, спрасціць візавыя працэдуры для беларусаў, якія ўцякаюць ад рэжыму.
“Мы заклікаем ЕС і яго партнёраў працягваць здзяйсняць ціск на рэжым праз пашырэнне і ўзмацненне санкцый супраць фізічных і юрыдычных асоб, адказных за рэпрэсіі ў Беларусі; нацэльвання іх на тых, хто нясе адказнасць за ўдзел Беларусі ў агрэсіўнай вайне Расіі супраць Украіны і прыняцце канкрэтных рашэнняў пытання аб прымусовай працы палітычных зняволеных”, — сказана ў заяве.
Шарэнда-Панасюк знаходзілася ў няволі з 3 студзеня 2021 года. Праз шэсць месяцаў пасля затрымання суд Маскоўскага раёна Брэста прыгаварыў яе да 2 гадоў пазбаўлення волі ва ўмовах агульнага рэжыму паводле арт. 364 (гвалт у дачыненні да супрацоўніка органаў унутраных спраў), 369 (абраза прадстаўніка ўлады) і 368 (абраза прэзідэнта) Крымінальнага кодэкса.
У красавіку 2022 года, кастрычніку 2023-га і кастрычніку 2024-га палітзняволеную прызнавалі вінаватай паводле арт. 411 КК (злоснае непадпарадкаванне патрабаванням адміністрацыі папраўчай установы, якая выконвае пакаранне ў выглядзе пазбаўлення волі). Дадаткова яна атрымала тры гады і адзін дзень пазбаўлення свабоды. Цяпер, а не пазней яна выйшла на волю ў сувязі з тым, што дзень у СІЗА лічыцца за паўтара.
21 сакавіка 2024 года Камітэт ААН па ліквідацыі дыскрымінацыі ў адносінах да жанчын заклікаў беларускія ўлады прыняць тэрміновыя меры для абароны Шарэнды-Панасюк. Гэта стала першым такім выпадкам па справах супраць Беларусі.
На наступны дзень у эфір выйшла інтэрв’ю палітзняволенай дзяржаўнаму тэлеканалу “Беларусь 1”, у якім яна сказала, што звярнулася да Лукашэнкі з прашэннем аб памілаванні.
Аб вызваленні актывісткі 1 лютага паведаміў яе муж Андрэй Шарэнда, які знаходзіцца за межамі Беларусі.