4 лютага, Позірк. Міжнародная федэрацыя хакея (ІІХФ) яшчэ на год працягнула адхіленне зборных Беларусі і Расіі ад удзелу ў чэмпіянатах свету. Адпаведнае рашэнне Савет ІІХФ прыняў 4 лютага, адзначае Федэрацыя хакея Беларусі.
Такім чынам, абедзве каманды прапусцяць два найбліжэйшыя першынствы: ЧС-2025 (рашэнне было прынятае 12 лютага 2024-га), якое пройдзе ў Даніі і Швецыі, а таксама ЧС-2026 — у Швейцарыі.
У сувязі з поўнамаштабнай вайной, якую Расія распачала ў тым ліку з выкарыстаннем беларускай тэрыторыі, хакейныя зборныя дзвюх краін не былі дапушчаныя да чэмпіянату свету 2022 года ў Фінляндыі. 27 траўня таго года ІІХФ забараніла беларусам і расіянам удзельнічаць у першынстве свету 2023 года.
Апошні раз зборныя Беларусі і РФ краін удзельнічалі ў ЧС-2021. Беларусы занялі перадапошняе — 15-е месца, расіяне — 5-е.
