За ўдзел у пратэстах будуць судзіць фітнес-трэнера, экс-тэлевядучую Наважылаву

11 лютага, Позірк. Суд Маскоўскага раёна Мінска 17 лютага пачне разгляд справы Наталлі Наважылавай, вынікае з раскладу пасяджэнняў на партале электроннага судаводства.

Яе абвінавачваюць паводле арт. 342 Крымінальнага кодэкса (арганізацыя і падрыхтоўка дзеянняў, што груба парушаюць грамадскі парадак, або актыўны ўдзел у іх). З 2020 года ўлады шырока выкарыстоўваюць гэты артыкул для пераследу ўдзельнікаў мірных акцый пратэсту.

Праваабарончы цэнтр “Вясна” і незалежныя СМІ мяркуюць, што судзіць будуць стваральніцу аднаго з першых у Беларусі фітнес-цэнтраў “Багіра”, вядомага трэнера і тэлевядучую Наталлю Наважылаву. Яе асабістыя даныя цалкам супадаюць з інфармацыяй, прадстаўленай у раскладзе судовых пасяджэнняў.

Наважылава нарадзілася ў 1955 годзе, яна майстар спорту па спартыўнай гімнастыцы, чэмпіёнка СССР, старшыня міжнароднага грамадскага аб’яднання “Федэрацыя фітнесу”, стваральніца Нацыянальнай школы фітнес-трэнераў, якія навучаліся ў “Багіры”.

Яе фітнес-цэнтр наведвалі як вядомыя людзі, так і звычайныя аматары спорту, якім аказваліся аднолькава якасныя паслугі.

З 1994 па 2001 год была вядучай тэлеперадачы “Урокі з Наталляй Наважылавай”, падчас якой дэманстраваліся трэніроўкі па фітнесе.

Паводле адкрытых крыніц, Наважылава была членам грамадскага аб’яднання “Гавары праўду”, на выбарах у мясцовыя саветы 2018 года з’яўлялася даверанай асобай палітыка Таццяны Караткевіч.

У 2019 годзе балатавалася кандыдатам у дэпутаты Палаты прадстаўнікоў, аднак яе кандыдатура не была зарэгістраваная.

На прэзідэнцкіх выбарах 2020 года была даверанай асобай кандыдата Андрэя Дзмітрыева.