Мужчына загінуў падчас валкі лесу ў Брагінскім раёне — СК
13 лютага, Позірк. У Верхняслабодскім лясніцтве (Брагінскі раён Гомельскай вобласці) падчас валкі лесу загінуў работнік, паведамляе прэс-служба Следчага камітэта.
Паводле інфармацыі ведамства, на 45-гадовага мужчыну ўпала спілаваная асіна. Ён памёр у бальніцы, так і не прыйшоўшы ў прытомнасць.
Абставіны здарэння праверыць Брагінскі раённы аддзел СК. Адзначаецца, што “асаблівая ўвага” будзе нададзеная “высвятленню прычын і ўмоў, якія садзейнічалі гібелі работніка”.
На фоне здарэння ведамства нагадала “пра неабходнасць выканання правілаў тэхнікі бяспекі і аховы працы”.
Пра гібель мужчын пры валцы лесу СК паведамляў 11 і 17 снежня 2024 года. Тыя надзвычайныя здарэнні адбыліся ў Быхаўскім (Магілёўская вобласць) і Лунінецкім (Брэсцкая вобласць) раёнах.
