У рамках праверкі боегатоўнасці беларускія салдаты вывучаюць досвед вайны ва Украіне і прымяненне БПЛА — Вальфовіч
13 лютага, Позірк. У рамках праверкі боегатоўнасці ваеннаабавязаныя вывучаюць вопыт “спецыяльнай ваеннай аперацыі ва Украіне”, на занятках “упор зроблены на прымяненне беспілотнай авіяцыі і абарону ад беспілотнай авіяцыі”, надаецца ўвага “пытанням тактычнай медыцыны”, заявіў 13 лютага дзяржаўны сакратар Савета бяспекі Аляксандр Вальфовіч.
Паводле яго слоў, якія перадае прэс-служба Міністэрства абароны, цяпер праводзяцца заняткі па баявой падрыхтоўцы, а таксама “планавыя мерапрыемствы ў воінскіх часцях”, звязаныя з такой падрыхтоўкай і накіраваныя на “аднаўленне навыкаў і падрыхтоўку ваенна-навучанага рэзерву”.
Вальфовіч сцвярджае, што “мерапрыемствы праверкі носяць планавы характар, а папрокі з боку Захаду на адрас Беларусі неабгрунтаваныя”.
“Апошнім часам кіраўніцтва калектыўнага Захаду папракае нас у тым, што мы рыхтуемся да нейкай агрэсіі, уяўляем пагрозу з усходу. Іх хвалюе беларуска-расійскае вучэнне, якое плануецца ў 2025 годзе. Нічога тут надзвычайнага няма. Гэтыя вучэнні, пачынаючы з 2009 года, праходзяць на планавай аснове кожныя два гады. Па чарзе: на тэрыторыі Рэспублікі Беларусь і на тэрыторыі Расійскай Федэрацыі. Правядзенне сумесных вучэнняў, якія плануюцца сёлета, — гэта адпрацоўка пытанняў і праверка гатоўнасці рэгіянальнай групоўкі войскаў абараніць тэрыторыю Саюзнай дзяржавы”, — адзначыў Вальфовіч, падкрэсліўшы, што задаволены якасцю правядзення заняткаў.
Паводле яго слоў, Мінабароны працягне рыхтаваць “ваенна-навучаны рэзерв” з грамадзян Беларусі, якія “прыйдуць у патрэбны момант і ўстануць на абарону суверэнітэту і тэрытарыяльнай цэласнасці” Беларусі.
Раней паведамлялася, што мінулай ноччу над Гомелем быў збіты лятальны аб’ект.
4 кастрычніка мінулага года Аляксандр Лукашэнка прызнаў факты парушэння мяжы баявымі беспілотнікамі і заявіў, што беларускі бок іх збівае незалежна, украінскія яны ці расійскія. Залет БПЛА ў Беларусь ён патлумачыў неспрактыкаванасцю аператараў, адзначыўшы, што пасля ўздзеяння сродкаў радыёэлектроннай барацьбы апараты губляюць арыенцір.
3 лютага прэс-служба Мінабароны Беларусі паведаміла аб пачатку праверкі баявой гатоўнасці ва Узброеных сілах.
Ведамства папярэдзіла, што на час праверкі “запланавана перамяшчэнне ваеннай тэхнікі”, таму “магчыма часовае абмежаванне руху грамадзянскага транспарту па дарогах агульнага карыстання і ўчастках мясцовасці”.
4 лютага стала вядома, што беларускі бок у добраахвотным парадку апавясціў аб раптоўнай праверцы баявой гатоўнасці ва Узброеных сілах удзельнікаў Венскага дакумента 2011 года аб мерах умацавання даверу і бяспекі.
“Паведамленыя мэты, тэрміны, колькасць удзельнікаў праверкі, а таксама іншая інфармацыя, накіраваная на забеспячэнне адкрытасці вайсковай дзейнасці на прасторы арганізацыі бяспекі і супрацоўніцтва ў Еўропе”, — адзначыла Мінабароны.
Рэжым Аляксандра Лукашэнкі безупынна праводзіць вучэнні, трэніроўкі, зборы на фоне абвастрэння адносін з Захадам і поўнамаштабнай вайны Расіі супраць Украіны, у якой афіцыйны Мінск падтрымлівае Крэмль.
У лютым 2022 года ўварванне ажыццёўлена ў тым ліку з беларускай тэрыторыі.