Кіраўнік офіса Зяленскага абвінаваціў Беларусь у пастаўках камплектуючых для расійскіх ракет Х-69
18 лютага, Позірк. Кіраўнік офіса прэзідэнта Украіны Андрэй Ярмак абвінаваціў Беларусь у пастаўках камплектуючых для вытворчасці расійскіх ракет Х-69.
“Расія выкарыстоўвае беларускія кампаненты для вырабу ракет Х-69”, — напісаў Ярмак у сваім тэлеграм-канале.
Ён не ўдакладніў, пра якія канкрэтна кампаненты ідзе гаворка і якія беларускія прадпрыемствы датычныя да такіх паставак.
Х-69 — расійская высокадакладная крылатая ракета класа “паветра-зямля”, з’яўляецца мадыфікацыяй ракеты Х-59. Носьбітамі ракеты могуць быць самалёты Су-34, Су-35С, МіГ-35С, МіГ-29К, Су-30МК, Су-57, Су-75 і інш. Ракета рэгулярна выкарыстоўваецца Расіяй для ўдараў па Украіне.
19 траўня 2024 года аб’яднанне былых сілавікоў BelPol апублікавала на сваім ютуб-канале расследаванне, у якім паведамляецца пра тое, як беларускія кампаніі зарабляюць мільёны долараў на пастаўках у Расію ўзбраенняў у абыход санкцый.
У цэнтры апавядання — дзейнасць ААТ “Пеленг”, якое знаходзіцца пад санкцыямі, аднаго з вядучых у сістэме Дзяржкамваенпрама. На аснове наяўных дакументаў BеlPol сцвярджае, што кампанія актыўна ўдзельнічае ў аснашчэнні расійскай баявой тэхнікі аптычнымі прыцэламі і іншым высокадакладным абсталяваннем. У гэтым ёй дапамагаюць іншыя беларускія прадпрыемствы, а таксама спецыяльна зарэгістраваныя фірмы-пракладкі. Камплектуючыя закупляюцца ў Кітаі, канчатковы прадукт прадаецца ў РФ і паступае на ўзбраенне расійскай арміі.
У кастрычніку таго ж года Беларускі расследвальніцкі цэнтр (БРЦ) паведаміў, што прадукцыя бабруйскага дзяржпрадпрыемства “Белшына” (Магілёўская вобласць) шырока выкарыстоўваецца ў расійскай ваеннай прамысловасці.
Альянс расследвальнікаў Беларусі ў траўні заявіў, што аршанскі завод “Легмаш” (Віцебская вобласць) можа працаваць на расійскі ваенпрам. Журналісты звярнулі ўвагу на тое, што падчас візіту на прадпрыемства Аляксандра Лукашэнкі справаздачу даваў справаздачу старшыня Дзяржкамваенпрама Дзмітрый Пантус.
Расследвальнікі здолелі распазнаць таварны код наменклатуры і назвы прадукцыі, якую паказвалі Лукашэнку. “Гэта тармазныя кольцы вялікія, малыя і паджымныя для вырабу 9М22У: 9М22У.02.001 9М22У.02.003 9М22У.01.019. Пад гэтай абрэвіятурай хаваецца асноўны снарад для РСЗА “Град”, — падкрэслілі журналісты.
