У студзені крымінальны пераслед паводле палітычных матываў зазнала не менш за 89 чалавек

25 лютага, Позірк. У студзені 2025 года ў Беларусі крымінальны пераслед паводле палітычных матываў зазнала не менш за 89 чалавек: 65 мужчын і 24 жанчыны, яшчэ адзін чалавек быў асуджаны завочна, гаворыцца ў штомесячнай справаздачы праваабарончага цэнтра “Вясна”.

Адзначаецца, што ў 55 выпадках (62%) у абвінавачанні фігураваў арт. 342 КК (арганізацыя і падрыхтоўка дзеянняў, якія груба парушаюць грамадскі парадак, альбо актыўны ўдзел у іх).

Больш за ўсё вядомых выпадкаў палітычнага крымінальнага пераследу праваабаронцы зафіксавалі ў Мінску, дзе ў студзені яго зазналі 42 чалавекі. Далей ідуць Брэсцкая (23), Магілёўская (8), Мінская (6), Гомельская і Гродзенская (па чатыры), Віцебская (два) вобласці.

Зазначаюцца пяць выпадкаў, калі паводле палітычных матывах прысуд выносілі цэлым сем’ям або групам сваякоў, а таксама тры выпадкі паўторнага ці наступнага асуджэння.

“Інструмент рэпрэсіўнага ўздзеяння на беларусаў у выглядзе артыкулаў і крымінальных спраў прывёў да таго, што грамадзяне баяцца званкоў на свае тэлефоны з незнаёмых нумароў, мяркуючы, што ім тэлефануюць з РУУС”, — адзначылі аўтары.

На вечар 31 снежня 2024 года ў Беларусі было 1.265 чалавек, якіх праваабарончая супольнасць прызнавала палітычнымі зняволенымі. На вечар 31 студзеня 2025 года — 1.245.

На 25 лютага — 1.213.