Вячорка: Вельмі добра, што Рыжанкоў запрасіў у Беларусь вярхоўнага камісара ААН па правах чалавека
26 лютага, Позірк. У Офісе Святланы Ціханоўскай вітаюць паведамленне МЗС Беларусі пра тое, што кіраўнік ведамства Максім Рыжанкоў запрасіў вярхоўнага камісара ААН па правах чалавека Фолькера Цюрка наведаць краіну.
“Вельмі добра, што запрасіў. Менавіта пра гэта тыдзень таму Святлана Ціханоўская гаварыла з Цюркам у Мюнхене на міжнароднай канферэнцыі па бяспецы. Прыехаць і наведаць палітвязняў, іх сем’і, тых, хто знаходзіцца ў інкамунікада (заблакаваная сувязь са знешнім светам. — “Позірк”.). І паставіць непрыемныя пытанні наўпрост прадстаўнікам рэжыму”, — заявіў “Позірку” галоўны дарадца дэмакратычнага лідара Франак Вячорка.
Ён таксама выказаўся па гэтай тэме ў сацыяльных сетках: “Мы вітаем намаганні вярхоўнага камісара па правах чалавека ААН па вызваленні палітвязняў, заклікаем прыняць запрашэнне наведаць Беларусь з наступнымі ўмовамі: 1) наведаць турмы і калоніі; 2) сустрэцца з тымі, хто інкамунікада, і сваякамі палітвязняў; 3) вызваліць людзей з гуманітарнага спісу; 4) даць палітвязням доступ да медыцыны і адвакатаў”.
“Гэта выдатная магчымасць прадстаўніку ААН ня проста ацаніць сітуацыю, а задаць пытанні прадстаўнікам рэжыму наўпрост. А для рэжыму — гэта выдатная магчымасць зрабіць “жэст добрай волі”: спыніць бесчалавечнае абыходжанне з палітвязнямі і вызваліць людзей, хаця б тых, хто ў цяжкім стане”, — напісаў Вячорка.
Рыжанкоў сустракаўся з Цюркам 26 лютага ў Жэневе. “Адбыўся крытычны абмен думкамі аб становішчы з правамі чалавека ў свеце”, — адзначалася ў паведамленні МЗС. Кіраўнік ведамства заявіў, што Мінск “працягне супрацьстаяць маніпуляванню праваабарончымі інструментамі, якое прыводзіць да таго, што правы чалавека ў так званых сталых дэмакратыях рэзка дэградуюць, а ўпраўленне вярхоўнага камісара па правах чалавека на гэтым сумным фоне канцэнтруецца на непажаданых Захаду краінах, уключаючы Беларусь“.
Рыжанкоў запрасіў Цюрка наведаць Беларусь, каб “асабіста азнаёміцца з рэальнай сітуацыяй з правамі чалавека ў краіне”.
У апублікаваным 17 сакавіка 2023 года дакладзе Цюрка заяўлялася аб “непрымальнай карціне беспакаранасці і амаль поўнага знішчэння грамадзянскай супольнасці і асноўных свабод” у Беларусі.
У дакладзе ўтрымліваўся заклік да дзяржаў — членаў ААН разгледзець пытанне аб прыцягненні да адказнасці з дапамогай нацыянальных разглядаў на аснове агульнапрынятых прынцыпаў экстэрытарыяльнай і універсальнай юрысдыкцыі.
16 лютага 2025 года Ціханоўская і Цюрк абмеркавалі сітуацыю з палітвязнямі ў Беларусі на палях Мюнхенскай канферэнцыі па бяспецы. Ціханоўская перадала яму дакументы ад беларускіх праваабаронцаў аб апошняй хвалі рэпрэсій, сітуацыі ў турмах і палітвязнях, якія знаходзяцца ў крытычным стане. Дэмлідар падкрэсліла, што сітуацыя катастрафічная і патрабуе неадкладнага ўмяшання.