За гібель двух пешаходаў кіроўца аўтобуса ў Чавусах атрымаў 4 гады калоніі-паселішча

4 верасня, Позірк. Да чатырох гадоў пазбаўлення волі з адбываннем пакарання ў папраўчай калоніі-паселішчы прыгавораны кіроўца аўтобуса, па віне якога ў Чавусах (Магілёўская вобласць) загінулі два пешаходы, паведаміла прэс-служба Вярхоўнага суда.

Раённы суд прызнаў яго вінаватым паводле ч. 3 арт. 317 Крымінальнага кодэкса (парушэнне правілаў дарожнага руху або эксплуатацыі транспартных сродкаў, што пацягнула па неасцярожнасці смерць дзвюх або больш асобаў).

Фігуранту таксама на пяць гадоў забаронена займацца дзейнасцю, звязанай з кіраваннем транспартнымі сродкамі. З яго на карысць сваякоў загінулых спагнана 1,7 тыс. рублёў выдаткаў на юрыдычную дапамогу. З транспартнай арганізацыі суд пастанавіў спагнаць 240 тыс. рублёў кампенсацыі маральнай шкоды і 400 рублёў выдаткаў на юрыдычную дапамогу.

Прысуд не набыў моц, можа быць абскарджаны і апратэставаны.

Аварыя здарылася 16 траўня 2026 года на аўтастанцыі. Адзначаецца, што кіроўца аўтобуса, які перавозіў пасажыраў па гарадскім маршруце, прыехаў на яе “ў стомленым стане“.

Перад тым як выйсці з аўтобуса, ён не перавёў аўтаматычную скрынку перадач у нейтральнае становішча, не ўключыў стаяначны тормаз і не заглушыў рухавік, а таксама адцягнуўся на размову па мабільным тэлефоне.

Пасля таго як кіроўца зачыніў пярэднія дзверы і выйшаў з аўтобуса, той пачаў самаадвольна рухацца наперад і наехаў на двух пешаходаў, мужчыну і жанчыну. Абодва памерлі на месцы.

Прычынай ДТЗ суд назваў парушэнне кіроўцам патрабаванняў працоўнай інструкцыі, кіраўніцтва па эксплуатацыі аўтобуса і ПДР, у тым ліку забарону кіраваць транспартным сродкам у стомленым стане і абавязкі прымаць меры, якія выключаюць яго самавольны рух.

Паведамляецца, што фігурант прызнаў віну і раскаяўся. Раней ён не быў судзімы, станоўча характарызуецца па месцы жыхарства і працы, на яго ўтрыманні малалетняе дзіця.