МУС прыгразіла школьнікам адказнасцю за ўжыванне спіртнога падчас вясновых канікул

23 сакавіка, Позірк. Кантроль за дзецьмі з’яўляецца “важнай задачай” бацькоў, “без нагляду дарослых значна ўзрастаюць рызыкі, звязаныя са здароўем і нават жыццём” школьнікаў, заявіў з нагоды наступлення вясновых канікул начальнік аддзела галоўнага ўпраўлення аховы правапарадку і прафілактыкі міліцыі грамадскай бяспекі МУС Беларусі Аляксандр Блізнюк.

Паводле яго слоў, якія перадае прэс-служба ведамства, школьнікаў падчас канікул “могуць уцягнуць у нарка- і кіберзлачынствы, а таксама іншыя супрацьпраўныя дзеянні”.

“Распаўсюджанымі правапарушэннямі на канікулах таксама з’яўляюцца крадзяжы, распіццё спіртных напояў і знаходжанне на вуліцы ноччу без суправаджэння дарослых. МУС нагадвае: за гэта прадугледжана адміністрацыйная адказнасць”, — сказаў Блізнюк.

У гэты перыяд, дадаў ён, “фіксуецца павелічэнне колькасці няшчасных выпадкаў, у тым ліку з-за грэбавання правіламі дарожнага руху і правіламі паводзін на аб’ектах чыгункі”.

Прадстаўнік МУС заклікаў бацькоў “кантраляваць вольны час сваіх дзяцей”. “Сачыце за іх актыўнасцю ў сацыяльных сетках. Раскажыце пра наступствы супрацьпраўных дзеянняў. Памятайце, што падлеткі, пакінутыя без кантролю, могуць трапіць у неспрыяльныя сітуацыі, куды іх прывядзе дапытлівасць, недахоп жыццёвага вопыту і ўяўнае пачуццё беспакаранасці. Самае галоўнае — адкрытыя зносіны з дзецьмі. Стварэнне давернай атмасферы дапаможа прадухіліць мноства праблем і забяспечаць ім бяспечныя канікулы”, — адзначыў Блізнюк.

Вясновыя канікулы ў школах працягнуцца да 30 сакавіка.

Больш за 1,4 тыс. “ліхадзействаў з удзелам непаўналетніх” зафіксавана ў 2024 годзе, паведамляла раней Міністэрства ўнутраных спраў.

“Пераважаюць крадзяжы, незаконны абарот сродкаў плацяжу, махлярства, а таксама нарказлачынствы, — заяўляла ведамства. — Акрамя таго, супрацоўнікамі выяўлена і спынена 268 “п’яных вечарынак”, на якіх прысутнічалі звыш 800 дзяцей. Ужыванне алкаголю, цыгарэт, вейпаў, наркотыкаў часцяком прыводзіць да непрыемных, а часам і трагічных наступстваў”.

Адзначаліся таксама “небяспекі” ў інтэрнэце: “Выкарыстоўваючы магчымасці сеткі і адпрацаваныя схемы падману, зламыснікі ўцягваюць падлеткаў у злачынствы. У сувязі з гэтым асаблівая ўвага надаецца прафілактычнай рабоце, накіраванай на недапушчэнне ўключэння дзяцей у распаўсюджванне наркотыкаў, выраб парнаграфіі, перасылку інтымных малюнкаў і многае іншае”.

Часцей за ўсё, сцвярджае МУС, “прычынамі здарэнняў з удзелам непаўналетніх з’яўляецца іх неасцярожныя паводзіны, недастатковы кантроль з боку дарослых і незанятасць падлеткаў у вольны ад вучобы час”.

Рост падлеткавай злачыннасці канстатаваў генеральны пракурор Андрэй Швед 9 студзеня на пасяджэнні рэспубліканскай каардынацыйнай нарады па барацьбе са злачыннасцю і карупцыяй.

Пры гэтым, паводле даных нагляднага ведамства, за апошнія 10 гадоў узровень злачыннасці сярод непаўналетніх паменшыўся ў два разы. За апошнія пяць гадоў колькасць злачынстваў, учыненых непаўналетнімі, зменшылася на 25%.

На думку Генпракуратуры, гэта адбылося “з прычыны належнай каардынацыі пракурорамі дзейнасці дзяржаўных органаў”.