У Дзяржынску пасля затрыманняў за ўдзел у пратэстах праведзена серыя ператрусаў

24 красавіка, Позірк. Пра серыю ператрусаў у Дзяржынску (Мінская вобласць) паведамляе праваабарончы цэнтр “Вясна”.

Ператрусы праведзеныя “пераважна ў тых, хто з’ехаў з краіны — вядома пра як мінімум чатыры такія выпадкі”, адзначаюць праваабаронцы.

Таксама ператрусы закранулі “людзей, якія не з’ехалі”.

“Вядома, што пратаколы ператрусу складаюць у адным экзэмпляры, на рукі людзям нічога не аддаюць”, — гаворыцца ў паведамленні.

18 красавіка паведамлялася аб затрыманні ў Дзяржынску не менш за пяць чалавек. Удакладнялася, што прычынай стаў удзел у паслявыбарчых акцыях пратэсту ў 2020 годзе — грамадзянам інкрымінуюць арт. 342 Крымінальнага кодэкса (арганізацыя і падрыхтоўка дзеянняў, якія груба парушаюць грамадскі парадак, альбо актыўны ўдзел у іх).

28 сакавіка праваабаронцы паведамлялі пра ператрусы, якія зладзіў Камітэт дзяржаўнай бяспекі ў прадстаўнікоў прафсаюзаў. “Вядома, што ў “прафсаюзнікаў” канфіскавалі тэхніку, але пасля допытаў адпусцілі. Паведамлялася, што сілавікоў цікавілі сувязі з [фондамі салідарнасці] BySol і ByHelp, а таксама ў людзей пыталіся пра так званае “фінансаванне тэрарыстычнай дзейнасці”, — гаварылася ў паведамленні.

Рэпрэсіі ў Беларусі не спыняюцца з 2020 года.