Памілаванне вязняў было сігналам Захаду, але гэты сігнал выявіўся слабым — спецдакладчык ААН па Беларусі
Спецдакладчык ААН па сітуацыі з правамі чалавека ў Беларусі Нілс Муйжніекс
25 красавіка, Позірк. Памілаванне палітвязняў было сігналам Захаду, але гэты сігнал выявіўся занадта слабым, такое меркаванне выказаў спецыяльны дакладчык ААН па сітуацыі з правамі чалавека ў Беларусі Нілс Муйжніекс 25 красавіка ў праграме “Сварка-шоу” ад “DW Беларусь”.
Паводле слоў спікера, на гэтыя сігналы Захад адказаў: “Пакажыце крыху больш”, даў зразумець, што калі рэжым Лукашэнкі хоча размаўляць, трэба вызваліць больш людзей.
На Захадзе, лічыць Муйжніекс, “вельмі скептычна глядзяць на намеры Лукашэнкі праводзіць рэформы або лібералізацыю, усе чакаюць нейкія вельмі сур’ёзныя крокі”.
Эксперт падкрэсліў, што развагі пра тое, якая стратэгія будзе лепшай для вызвалення палітвязняў, па-за яго мандатам. Разам з тым, паводле яго слоў, “каб гэта прыцягвала ўвагу заходніх палітыкаў, трэба будзе [вызваліць] некалькі соцень, і вельмі важныя будуць імёны памілаваных”.
“Калі не будзе такіх прозвішчаў, як [экс-прадстаўніца штаба Віктара Бабарыкі, паплечніца дэмакратычнага лідара Святланы Ціханоўскай Марыя] Калеснікава, [муж дэмлідара, відэаблогер Сяргей] Ціханоўскі, [лаўрэат Нобелеўскай прэміі міру, кіраўнік праваабарончага цэнтру “Вясна” Алесь] Бяляцкі, я думаю, што ніхто не прыме гэта да ўвагі”, — канстатаваў Муйжніекс.
З ліпеня 2024 года па студзень 2025-га ў Беларусі было дзесяць хваляў памілаванняў (пераважна на падставе ўказаў Лукашэнкі), у выніку якіх на волю выйшла больш за 250 палітвязняў. Апошні раз гэта адбылося 24 студзеня, перад працэдурай, якую афіцыйны Мінск лічыць “прэзідэнцкімі выбарамі”. Дэмакратычныя краіны не прызналі гэтае мерапрыемства сапраўднымі выбарамі, а Лукашэнку — легітымным прэзідэнтам. Пасля гэтага памілаванняў больш не было.
Разам з тым людзей у краіне працягваюць затрымліваць і судзіць у крымінальным парадку па палітычна матываваных крымінальных справах.