Беларускія вайскоўцы змогуць вучыць англійскую мову ў Пакістане

14 траўня, Позірк. Беларускія вайскоўцы і грамадзянскія спецыялісты змогуць праходзіць навучанне англійскай мове ва ўстановах адукацыі Пакістана. Гэта прадугледжана пагадненнем аб двухбаковым ваенным супрацоўніцтве, падпісаным міністэрствамі дзвюх краін.

14 траўня дакумент апублікаваны на Нацыянальным прававым інтэрнэт-партале.

У пагадненні прадугледжана аналагічная норма для пакістанскіх вайскоўцаў: яны змогуць вывучаць у Беларусі рускую мову.

Іншыя выкладзеныя ў пагадненні формы супрацоўніцтва ўключаюць: афіцыйныя візіты кіраўнікоў ваенных ведамстваў; рабочыя візіты, сустрэчы і кансультацыі бакоў; падрыхтоўку ваеннаслужачых і грамадзянскіх спецыялістаў “на аснове ўзаемнасці”.

Міністэрствы абароны дамовіліся аказваць усе віды гуманітарнай узаемадапамогі, удзельнічаць у сумесных ваенных вучэннях, спартыўных трэніроўках і спаборніцтвах.

Ведамствы будуць узаемадзейнічаць таксама ў падрыхтоўцы навукова-педагагічных кадраў, супрацоўнічаць у сферы медыцыны, культуры, у галіне метадаў і тэхналогій процідзеяння тэрарызму.

Адзначана, што бакі могуць вызначаць іншыя вобласці, якія ўяўляюць узаемную цікавасць, і заключаць асобныя пагадненні для іх рэалізацыі.

Пагадненне ўступіла ў сілу з моманту падпісання.

Аб падпісанні пагаднення аб ваенным супрацоўніцтве па выніках перамоў Аляксандра Лукашэнкі і прэм’ер-міністра Пакістана Шахбаза Шарыфа паведамлялася 11 красавіка. У той жа дзень Дзяржаўны ваенна-прамысловы камітэт Беларусі і Міністэрства абароннай прадукцыі Пакістана зацвердзілі праграму (дарожную карту) ваенна-тэхнічнага супрацоўніцтва на 2025–2027 гады.

Акрамя таго, былі падпісаныя міжурадавае пагадненне аб рэадмісіі, пагадненне аб супрацоўніцтве паміж міністэрствамі ўнутраных спраў у галіне барацьбы са злачыннасцю і іншыя пагадненні.

Англійская з’яўляецца афіцыйнай мовай у Пакістане (дзяржаўная мова — урду).