Польскія памежнікі затрымалі грамадзяніна Беларусі, які перавозіў нелегальных мігрантаў

5 чэрвеня, Позірк. Польскія памежнікі 4 чэрвеня затрымалі грамадзяніна Беларусі, які перавозіў нелегальных мігрантаў.

Паводле інфармацыі прэс-службы Падляскага падраздзялення Памежнай аховы Польшчы, мужчына праязджаў на аўтамабілі “Опель” ля вёскі Вейкі і не адрэагаваў на пададзены супрацоўнікамі пагранзаставы ў Баброўніках сігнал аб спыненні. Пасля непрацяглага пераследу аўтамабіль спынілі.

“Кіроўцам выявіўся грамадзянін Беларусі, які перавозіў замежнікаў пасля незаконнага перасячэння дзяржаўнай мяжы”, — гаворыцца ў паведамленні.

У 2025 годзе супрацоўнікі Падляскага памежнага атрада затрымалі 74 памагатых і арганізатара незаконнага перасячэння польска-беларускай мяжы.

У ведамстве ўдакладняюць, што ў Польшчы за арганізацыю і садзейнічанне арганізацыі незаконнага перасячэння мяжы прадугледжанае пазбаўленне волі на тэрмін да 8 гадоў.

За мінулыя суткі польскія памежнікі прадухілілі “амаль 170” спробаў мігрантаў нелегальна перасекчы мяжу з боку Беларусі.

Міграцыйны крызіс на мяжы Беларусі і краін ЕС цягнецца з вясны 2021 года. Улады суседніх еўрапейскіх дзяржаў лічаць яго “гібрыднай атакай”, арганізаванай рэжымамі ў Мінску і Маскве.

Аляксандр Лукашэнка неаднаразова заяўляў, што беларускія пагранічнікі не будуць спыняць нелегальных мігрантаў, якія накіроўваюцца у Еўрасаюз праз Беларусь, бо іх туды “паклікалі”.