16 чэрвеня, Позірк. У беларускім пункце пропуску Беняконі (з літоўскага боку — Шальчынінкай) працягваецца рамонт дарожнага палатна, паведамляе прэс-служба Дзяржаўнага мытнага камітэта.
Паводле інфармацыі ведамства, 16–20 чэрвеня там укладваюць асфальтабетоннае пакрыццё. Рамонтныя работы могуць адбіцца на “ўскладненні руху транспартных сродкаў, што рухаюцца праз гэты пункт пропуску”. У мытным камітэце заклікалі ўлічваць гэта “пры планаванні перасячэння беларуска-літоўскай мяжы”.
Паводле даных Дзяржаўнага пагранічнага камітэта, на 14:00 выезду з Беларусі ў пункце Беняконі чакала 30 легкавых і 490 грузавых аўтамабіляў.
На мяжы Літвы з Беларуссю працягваюць працаваць два пагранпераходы — Мядзінінкай (Каменны Лог) і Шальчынінкай (Беняконі).
8 жніўня 2023 года Літва закрыла пункты пропуску Шумскас (з беларускага боку — Лоша) і Цвярачус (Відзы), 1 сакавіка 2024-га — Лаварышкес (Катлоўка) і Райгардас (Прывалка).
