Беларусь трымае пэўныя падраздзяленні на мяжы з Украінай, але сфармаваных сіл там няма — ДПСУ
Спікер Дзяржаўнай памежнай службы Украіны Андрэй Дземчанка
20 чэрвеня, Позірк. Беларусь “па-ранейшаму трымае пэўныя падраздзяленні” па накіраванні ўкраінскай мяжы — каб паказаць, што Кіеў “нібыта прадстаўляе пагрозу” для Мінска, заявіў 20 чэрвеня на тэлебачанні спікер Дзяржаўнай памежнай службы Украіны (ДПСУ) Андрэй Дземчанка.
“Але такая сітуацыя [захоўваецца] яшчэ з 2022 года”, — цытуе чыноўніка агенцтва “Укрінформ”. Прадстаўнік ДПСУ дадаў, што беларускія ўлады “пастаянна падтрымліваюць такую рыторыку”.
У той жа час, паводле слоў Дземчанкі, на гэты момант “нейкіх сфармаваных сіл, якія знаходзіліся б на тэрыторыі Беларусі” па накіраванні ўкраінскай мяжы, “не фіксуецца”.
Спікер ДПСУ падкрэсліў, што цяпер задача заключаецца ў тым, каб адсочваць сітуацыю “падчас сумесных вучэнняў Расіі і Беларусі, актыўная фаза якіх плануецца на верасень” (стратэгічныя вучэнні “Захад-2025”).
“У гэты час можа ўзрастаць рызыка для нашай краіны, асабліва з улікам таго, якую колькасць сваіх сіл Расія зможа прыцягнуць на тэрыторыю Беларусі да гэтых вучэнняў, — сказаў ён. — Але гэта задача падраздзяленняў выведкі — як Міністэрства абароны, так і Дзяржаўнай памежнай службы, — для таго, каб своечасова атрымаць неабходную інфармацыю, аналіз якой паказваў бы, наколькі пагроза можа ісці ў гэты час для нашай дзяржавы”.
16 чэрвеня Дземчанка не выключыў, што падчас вучэнняў “Захад-2025” могуць быць зробленыя “нейкія дэманстратыўныя дзеянні” ў напрамку ўкраінскай мяжы.
За некалькі дзён да гэтага, 13 чэрвеня, украінскі прэзідэнт Уладзімір Зяленскі, спаслаўшыся на даныя Службы знешняй выведкі, паведаміў журналістам, што Беларусь, імаверна, паспрабуе адвесці сумесныя з Расіяй вучэнні “крыху ўглыб” сваёй тэрыторыі, далей ад мяжы з Украінай, каб пазбегнуць правакацый.
Раней Зяленскі неаднаразова заяўляў пра планаванае нарошчванне расійскай вайсковай моцы і магчымасці ўзброенага ўварвання арміі РФ на тэрыторыю Польшчы, Літвы і Латвіі з тэрыторыі Беларусі па аналогіі з падзеямі 24 лютага 2022 года. Тады расійскае ваеннае ўварванне ва Украіну часткова ажыццяўлялася з тэрыторыі Беларусі.
28 траўня міністр абароны Віктар Хрэнін заявіў на сустрэчы з калегамі з краін АДКБ пра “зніжэнне параметраў” вучэнняў “Захад-2025” і перанос манеўраў ад межаў углыб Беларусі.
