У Польшчы затрымана беларуска, якая перавозіла мігрантаў, у тым ліку ў багажніку

20 чэрвеня, Позірк. У польскім Гарваліне (каля 60 км на паўднёвы ўсход ад Варшавы, Мазавецкае ваяводства) пасля атрымання інфармацыі ад памежнай службы ў Славатычах (Люблінскае ваяводства, мяжуе з Беларуссю) затрыманы аўтамабіль “Сітраен”, які перавозіў нелегальных мігрантаў, паведаміла прэс-служба гарадской паліцыі.

Адзначаецца, што 18 чэрвеня, накіраваўшы патруль на адну з трас, супрацоўнікі “заўважылі “Сітраен”, які адпавядаў апісанню, перададзенаму памежнікамі”: “Паліцыя паспяхова спыніла аўтамабіль <…>. За рулём знаходзілася беларуска, а пасажырам быў грамадзянін Аргенціны. Усяго на заднім сядзенні і ў багажніку знаходзіліся пяць іншаземцаў”.

Паводле інфармацыі паліцыі, “камунікацыя з пасажырамі была ўскладнена праз моўны бар’ер, у іх былі дакументы, якія сведчаць асобу, верагодна, усе прыехалі з Афганістана”: “Пра затрыманне былі апавешчаныя супрацоўнікі памежнай службы Славатыч, якім па прыездзе на месца здарэння быў перададзены аўтамабіль з затрыманымі”.

Далейшыя дзеянні паводле гэтай справы праводзяцца супрацоўнікамі згаданай памежнай службы.

4 чэрвеня польскія памежнікі таксама затрымалі грамадзяніна Беларусі, які таксама перавозіў нелегальных мігрантаў.

У ведамстве ўдакладнілі, што ў Польшчы за арганізацыю і садзейнічанне незаконнаму перасячэнню мяжы прадугледжана пазбаўленне волі на тэрмін да васьмі гадоў.