Урад Беларусі перадаў Нігерыі “тысячы адзінак” тэхнікі
24 чэрвеня, Позірк. “Тысячы адзінак беларускай тэхнікі” перададзеныя Нігерыі дэлегацыяй урада Беларусі 24 чэрвеня падчас урачыстай цырымоніі ў Абуджы.
Як паведамляе прэс-служба ўрада, у мерапрыемстве прыняў удзел прэзідэнт Нігерыі Бола Цінубу.
Беларускую дэлегацыю падчас візіту ў гэтую афрыканскую краіну ўзначальвае намеснік прэм’ер-міністра Віктар Каранкевіч.
Якая менавіта тэхніка перададзеная Нігерыі, не ўдакладняецца. На апублікаваным у тэлеграм-канале беларускага ўрада відэа паказаныя трактары.
Адзначаецца, што прэзідэнту Нігерыі перададзена запрашэнне ад Аляксандра Лукашэнкі наведаць Беларусь, якое той “прыняў”.
Каранкевіч паведаміў, што афіцыйная перадача беларускай тэхнікі адбылася ў межах рэалізацыі дарожнай карты, падпісанай паміж Міністэрствам сельскай гаспадаркі і харчовай бяспекі Нігерыі і ўрадам Беларусі. Ён назваў гэту падзею “значным укладам ва ўмацаванне харчовай бяспекі Нігерыі, павышэнне дабрабыту і дастатку грамадзян”.
Паводле слоў віцэ-прэм’ера, у межах рэалізацыі другога і трэцяга этапаў дарожнай карты будуць стварацца “сучасныя сэрвісныя цэнтры з наяўнасцю мабільных брыгад”, якія будуць забяспечваць абслугоўванне і рамонт тэхнікі. “У планах таксама стварэнне зборачных вытворчасцяў. Разглядаецца будаўніцтва збожжасушыльных комплексаў. У парадку дня і пытанні навучання персаналу, які будзе эксплуатаваць тэхніку, а пасля займацца рамонтам, зборкай з беларускіх машынакамплектаў”, — сказаў Каранкевіч.
Перспектыўнымі кірункамі двухбаковага супрацоўніцтва чыноўнік таксама назваў ахову здароўя, пастаўкі медыцынскіх прэпаратаў і абсталявання, павелічэнне колькасці нігерыйскіх студэнтаў у беларускіх навучальных установах.
У красавіку Беларусь наведвала ваенная дэлегацыя Нігерыі на чале з кіраўніком цэнтра баявой падрыхтоўкі сухапутных войскаў.
Беларусь і Нігерыя ўстанавілі дыпламатычныя адносіны 3 жніўня 1992 года. Беларуская амбасада ў Абуджы адкрылася ў снежні 2011 года. З 2018 да 2021 год двухбаковы тавараабарот, паводле даных беларускай боку, стабільна падаў. Калі ў 2018 годзе ўзаемны гандаль быў на ўзроўні 38,8 млн долараў (беларускі экспарт — 31 млн, нігерыйскія пастаўкі — 7,8 млн), то ў 2019-м — 11,8 млн (9,5 млн; 2,3 млн), у 2020-м — 8,4 млн (6,3 млн; 2,1 млн), у 2021-м — 7,8 млн (5,6 млн; 2,2 млн). Даныя за наступныя гады ў адкрытым доступе адсутнічаюць.
